Gold Price: सोन्याच्या किंमतीने आज एक नवा उच्चांक गाठला आहे आणि ग्राहकांमध्ये प्रचंड उत्सुकता निर्माण झाली आहे. एमसीएक्सवर सोन्याचा भाव 99,500 रुपयांवर उघडला असून, मागील बंद भावाच्या तुलनेत तब्बल 1,108 रुपयांची वाढ झाली आहे. यामुळे सोनं खरेदी करणाऱ्यांसाठी आणि गुंतवणूकदारांसाठी हे मोठं लक्षवेधी ठरलं आहे. या पार्श्वभूमीवर दिवाळीपर्यंत सोन्याचा भाव आणखी किती वाढू शकतो, याची चर्चा आता सुरू झाली आहे.
वित्तीय संस्थांनी आणि तज्ज्ञांनी याबाबत आपापले अंदाज वर्तवले आहेत. बँक ऑफ अमेरिका या आघाडीच्या संस्थेने येत्या 12 महिन्यांत सोन्याचा आंतरराष्ट्रीय दर 4,000 डॉलर प्रति औंसपर्यंत पोहोचू शकतो असा अंदाज व्यक्त केला आहे. त्याचवेळी गोल्डमन सॅक्स या नामवंत वित्त संस्थेने 2025 च्या अखेरीस 3,700 डॉलर प्रति औंस आणि 2026 च्या मध्यास 4,000 डॉलर प्रति औंसपर्यंत दर पोहोचेल असे म्हटले आहे. हे दर गाठल्यास सोन्याच्या किंमतींनी सर्व विक्रमी पातळ्या पार केल्या असतील.
भारतीय बाजारपेठेत याचा थेट परिणाम होणार आहे. जर डॉलरच्या तुलनेत रुपया 83 दराने स्थिर राहिला, तर प्रति तोळा सोन्याचा दर 1,24,500 रुपयांपर्यंत जाऊ शकतो. यामध्ये जीएसटी, हॉलमार्किंग शुल्क, व्यापाऱ्यांचे नफे आणि इतर करांचा विचार केला असता प्रति तोळा सोनं 1,40,000 ते 1,45,000 रुपयांदरम्यान राहण्याची शक्यता आहे. ही दरवाढ सामान्य ग्राहकांसाठी मोठी झळ ठरू शकते, तर गुंतवणूकदारांसाठी नफा मिळवण्याची संधी असू शकते.
सोन्याच्या दरावर जागतिक घडामोडींचा थेट प्रभाव असतो. युक्रेन-रशिया संघर्ष, इस्रायल-इराण तणाव, डॉलरचे मूल्य, जागतिक महागाई आणि अमेरिकी फेडरल रिझर्व्हच्या व्याजदर धोरणांचा यावर परिणाम होतो. युद्धसदृश परिस्थिती किंवा आर्थिक अस्थिरतेच्या वेळी गुंतवणूकदार शेअर बाजार किंवा इतर जोखमीच्या पर्यायांपेक्षा सोन्याकडे वळतात. यामुळे मागणी वाढते आणि दर वाढतात.
केंद्रीय बँकांकडून देखील मोठ्या प्रमाणावर सोने खरेदी सुरू आहे. देशांचे सोन्यातील गुंतवणूक वाढत असल्यामुळे बाजारात त्याची उपलब्धता मर्यादित होत आहे आणि त्यामुळे दर वाढण्यास हातभार लागतो. अनेक गुंतवणूकदार सोन्याला एक ‘सेफ हेवन’ म्हणून पाहतात. महागाई आणि आर्थिक संकटाच्या वेळी त्याला मागणी अधिक असते.
