मुंबई: राज्याच्या सुरक्षेला बाधा आणू पाहणाऱ्या देशविघातक शक्तींविरुद्ध महाराष्ट्र दहशतवादविरोधी पथकाने (ATS) आता 'मिशन ऑल आऊट' हाती घेतल्याचे चित्र आहे. शुक्रवारी मध्यरात्रीपासून एटीएसने राज्याच्या विविध भागांत अत्यंत गोपनीयरीत्या छापेमारी सुरू केली असून, या धडाकेबाज कारवाईने संपूर्ण महाराष्ट्रात मोठी खळबळ उडाली आहे. विशेषतः विदर्भ आणि पश्चिम महाराष्ट्रातील काही संवेदनशील भागांवर एटीएसने आपले लक्ष केंद्रित केले असून, पहाटेच्या शांततेत सुरू झालेल्या या मोहिमेने संशयितांचे धाबे दणाणले आहेत.
मिळालेल्या अधिकृत माहितीनुसार, एटीएसच्या पथकांनी राज्याच्या विविध भागांत एकूण 21 ठिकाणी एकाच वेळी शोधमोहीम राबवली. यामध्ये यवतमाळ जिल्ह्यातील पुसद आणि उमरखेडमध्ये 14 ठिकाणी, तर अहिल्यानगरमध्ये सात ठिकाणी छापे टाकण्यात आले आहेत. अकोला जिल्ह्यातील उरळ पोलीस स्टेशनच्या हद्दीतही संशयास्पद हालचालींची दखल घेत पथकाने तपास सुरू केला आहे. ही कारवाई इतकी गुप्त होती की, स्थानिक स्तरावरही याची कुणकुण लागली नव्हती, ज्यामुळे या मोहिमेचे गांभीर्य अधिक अधोरेखित होत आहे.
सूत्रांनी दिलेल्या माहितीनुसार, काही आंतरराष्ट्रीय दहशतवादी संघटनांच्या संपर्कात राहून स्थानिक तरुणांना 'ब्रेनवॉश' करण्याचे आणि त्यांना देशविरोधी कारवायांत सक्रिय करण्याचे षडयंत्र रचले जात असल्याची माहिती गुप्तचर यंत्रणांना मिळाली होती. संभाव्य घातपाती कारवायांचा धोका ओळखून, शत्रूचे मनसुबे उधळून लावण्यासाठी एटीएसने हे 'सर्जिकल स्ट्राईक' सदृश पाऊल उचलले आहे. तरुणांची दिशाभूल करून त्यांना दहशतवादाच्या वाटेवर नेणाऱ्या या साखळीचा मुख्य दुवा शोधण्यासाठी यंत्रणा अहोरात्र काम करत आहे.
हेही वाचा: Uddhav Thackeray's Son : उद्धव ठाकरे यांच्या चिरंजीवाची प्रकृती बिघडली, रुग्णालयात दाखल
एटीएस प्रमुख चंद्रकिशोर मीणा यांच्या नेतृत्वाखाली विविध विशेष पथके तयार करण्यात आली आहेत. केवळ यवतमाळ जिल्ह्यात एटीएसची 20 पथके तळ ठोकून असून, यामध्ये आयपीएस दर्जाच्या वरिष्ठ अधिकाऱ्यांचाही समावेश आहे. स्थानिक पोलिसांच्या मदतीने संशयास्पद घरांची झडती घेतली जात असून डिजिटल पुरावे आणि कागदपत्रांची कसून तपासणी सुरू आहे. या परिसरात सध्या मोठा पोलीस बंदोबस्त तैनात करण्यात आला असून संपूर्ण गावाला एका अर्थाने छावणीचे स्वरूप आले आहे.
या कारवाईदरम्यान आतापर्यंत अनेकांना ताब्यात घेऊन त्यांची गोपनीय ठिकाणी चौकशी केली जात आहे. जरी अद्याप अधिकृतपणे कोणालाही अटक झाल्याची नोंद नसली, तरी या चौकशीतून अनेक धक्कादायक माहिती समोर येण्याची दाट शक्यता वर्तवण्यात येत आहे. कोणतीही अनुचित घटना घडण्यापूर्वीच तपास यंत्रणांनी हे मोठे जाळे उध्वस्त करण्यास सुरुवात केली आहे.
एकूणच, विदर्भातील दुर्गम भागापासून ते पश्चिम महाराष्ट्राच्या शहरांपर्यंत पसरलेले हे धाडसत्र राज्याच्या सुरक्षेसाठी अत्यंत महत्वाचे मानले जात आहे. दहशतवादाचे विष पेरणाऱ्या प्रवृत्तींना मुळासकट नष्ट करण्यासाठी एटीएसने पुकारलेले हे युद्ध येणाऱ्या काळात कोणत्या मोठ्या गुपितांचा उलगडा करते, याकडे आता संपूर्ण महाराष्ट्राचे लक्ष लागून राहिले आहे.
हेही वाचा: Mutual Fund SIP: कमी जोखीम आणि अधिक परतावा; म्युच्युअल फंड SIP मधील 'पॉवर ऑफ कंपाउंडिंग' समजून घ्या