मुंबईकरांची सकाळ आज नेहमीसारखी धावपळीची असली, तरी एक नकोशी बातमी घेऊन आली आहे. महागाईच्या वणव्यात होरपळणाऱ्या सर्वसामान्यांच्या खिशाला आता आणखी एक मोठी कात्री लागणार आहे. मुंबई आणि महानगर क्षेत्रात (MMR) सीएनजी (CNG) पुरवठा करणाऱ्या महानगर गॅस लिमिटेडने (MGL) आजपासून सीएनजीच्या दरात वाढ करण्याची घोषणा केली आहे. त्यामुळे, सार्वजनिक आणि खाजगी वाहतुकीवर अवलंबून असलेल्या लाखो मुंबईकरांचे आर्थिक बजेट कोलमडण्याची चिन्हे स्पष्ट दिसत आहेत.
मिळालेल्या अधिकृत माहितीनुसार, महानगर गॅसने सीएनजीच्या दरात प्रति किलो एक रुपयाची वाढ केली आहे. या नव्या दरवाढीनंतर मुंबई, ठाणे, नवी मुंबई आणि आसपासच्या परिसरांमध्ये सीएनजीचा दर आता 82 रुपये प्रति किलोवर पोहोचला आहे. मुंबईत सध्या सार्वजनिक आणि खाजगी अशी मिळून सुमारे 12 लाखांहून अधिक सीएनजी वाहने रस्त्यावर धावतात. यात 4.7 लाख रिक्षा, 1.6 लाख टॅक्सी आणि बेस्टसह इतर महापालिकांच्या सुमारे 2000 बसेसचा समावेश आहे. या सर्व वाहनधारकांना आणि पर्यायाने प्रवाशांना या दरवाढीचा थेट फटका बसणार आहे.
या दरवाढीमागे केवळ स्थानिक कारणे नसून जागतिक घडामोडींचेही मोठे सावट आहे. इराण आणि अमेरिका यांच्यात निर्माण झालेल्या युद्धजन्य परिस्थितीमुळे आंतरराष्ट्रीय बाजारात नैसर्गिक वायूच्या दरांवर मोठा परिणाम झाला आहे. त्यातच देशांतर्गत गॅस वाटपात झालेली कपात आणि कच्च्या तेलाच्या वाढत्या किमती यामुळे गॅस खरेदीचा खर्च लक्षणीयरीत्या वाढला आहे. याच आर्थिक दबावापोटी आणि वाढत्या खर्चाचा ताळमेळ बसवण्यासाठी ही दरवाढ करणे प्रशासनाला भाग पडल्याचे स्पष्टीकरण महानगर गॅस लिमिटेडच्या अधिकाऱ्यांनी दिले आहे.
हेही वाचा: Rohit Pawar On BJP : 'भाजप त्यांच्याच मित्र पक्षाची शिकार करणार'; रोहित पवारांच्या दाव्याने महाराष्ट्राच्या राजकारणात भूकंप
मात्र, या महागाईच्या झटक्यातही गृहिणींसाठी एक मोठा दिलासा देणारी बातमी आहे. वाहनांसाठी लागणारा सीएनजी महागला असला तरी, घरगुती वापरासाठी पाईपद्वारे पुरवल्या जाणाऱ्या पीएनजी (PNG) गॅसच्या दरात कोणताही बदल करण्यात आलेला नाही. पीएनजीचा दर 50 रुपये प्रति युनिटवरच स्थिर ठेवण्यात आला आहे. त्यामुळे एमएमआर क्षेत्रातील सुमारे 31 लाख कुटुंबांना मोठा आधार मिळाला आहे. एलपीजी सिलिंडरच्या टंचाईची समस्या आणि वाढत्या दरांमुळे अनेक कुटुंबांचा कल आता सुरक्षित आणि स्वस्त अशा पीएनजीकडे वाढताना दिसत आहे.
या दरवाढीचे पडसाद आता रस्त्यांवरही उमटण्याची शक्यता आहे. रिक्षा आणि टॅक्सी चालकांमध्ये या निर्णयामुळे तीव्र नाराजी पसरली आहे. इंधनाचे दर सतत वाढत असल्याने व्यवसाय करणे कठीण झाल्याचे मत मुंबई रिक्षा युनियनच्या नेत्यांनी व्यक्त केले आहे. परिणामी, आता रिक्षा आणि टॅक्सीच्या किमान भाड्यातही (Minimum Fare) एक रुपयाची वाढ करण्याची मागणी जोर धरू शकते. असे असले तरी, पेट्रोलच्या तुलनेत सीएनजी अद्यापही 46 टक्क्यांनी स्वस्त असल्याचा दावा करत एमजीएलने त्यांच्या निर्णयाचे समर्थन केले आहे. मात्र, दररोज प्रवास करणाऱ्या मुंबईकरांसाठी हा वाढीव बोजा नक्कीच चिंतेचा विषय ठरला आहे.
हेही वाचा: India Oil Production: जागतिक तेलसंकटाच्या सावटात भारताला मोठा दिलासा! राजस्थानमध्ये कच्च्या तेलाचे उत्पादन वाढले, देशाच्या ऊर्जा सुरक्षेला मिळणार बळ