मुंबई: गर्दीने गजबजलेली मुंबई, प्रवासात वेळेशी स्पर्धा करणारे लाखो प्रवासी आणि त्यांच्यासाठी एक नवी डिजिटल क्रांती! मुंबई मेट्रो रेल कॉर्पोरेशन (MMRC) ने आता प्रवाशांचा प्रवास आणखी सहज, वेगवान आणि स्मार्ट करण्यासाठी मोठं पाऊल उचललं आहे. मुंबई मेट्रो लाईन 3 म्हणजेच अॅक्वा लाईन वर प्रवाशांसाठी व्हॉट्सॲपद्वारे तिकीट बुकिंगची सुविधा सुरू करण्यात आली आहे.
दिवसभराच्या धकाधकीनंतर स्टेशनवर रांगेत उभं राहून तिकीट काढण्याचं कष्टदायक काम आता इतिहासजमा होणार आहे. कारण आता फक्त मोबाईलवर “Hi” असा एक मेसेज पाठवा, आणि काही सेकंदांत तुमचं मेट्रो तिकीट तयार!
दक्षिण मुंबईतील कफ परेडपासून ते आरे जेव्हीएलआरपर्यंत पसरलेल्या अॅक्वा लाईनवरील प्रवाशांसाठी ही सोय वरदान ठरणार आहे. प्रवासाचा अनुभव अधिक आधुनिक, वेगवान आणि तणावरहित बनवण्याचा एमएमआरसीचा हा डिजिटल प्रयत्न आहे.
हेही वाचा: Central Railway Megablock: 24 ऑक्टोबरपासून 1 नोव्हेंबरपर्यंत मध्य रेल्वेवर मेगाब्लॉक; वेळापत्रक लगेच तपासा
एमएमआरसीच्या व्यवस्थापकीय संचालक अश्विनी भिडे यांनी सांगितले, “मुंबईतील नागरिकांना अखंडित आणि तंत्रज्ञानाधारित प्रवास देणे हे आमचे उद्दिष्ट आहे. व्हॉट्सॲप तिकीट प्रणाली हा त्याच दिशेने टाकलेला महत्त्वाचा टप्पा आहे.”
तिकीट बुकिंगची नवी सोय, काही सेकंदांत प्रक्रिया
या नवीन प्रणालीत प्रवासी एकाच वेळी जास्तीत जास्त सहा तिकिटे काढू शकतील. प्रक्रिया अगदी सोपी, फक्त व्हॉट्सॲपवर +91 98730 16836 या क्रमांकावर “Hi” असा संदेश पाठवायचा किंवा स्टेशनवरील QR कोड स्कॅन करायचा. त्यानंतर प्रवासाचं ठिकाण निवडून UPI किंवा कार्डद्वारे पेमेंट करायचं आणि लगेचच मोबाईलवर मिळणार डिजिटल QR कोड तिकीट, जे थेट गेटवर स्कॅन करता येईल.
यात सर्वात मोठं वैशिष्ट्य म्हणजे UPI द्वारे पेमेंट केल्यास कोणतंही अतिरिक्त शुल्क नाही. कार्ड वापरल्यास केवळ नाममात्र व्यवहार शुल्क लागू होईल.
पर्यावरणपूरक आणि वेळ वाचवणारा प्रवास
ही सेवा आधीच लाईन 2A आणि 7 वर यशस्वीपणे राबवण्यात आली असून, प्रवाशांचा उत्तम प्रतिसाद पाहता आता ती लाईन 3 वरही उपलब्ध झाली आहे. यामुळे कागदी तिकिटांचा वापर कमी होईल, पर्यावरणपूरक प्रवासाला चालना मिळेल आणि वेळेची मोठी बचत होईल.
मुंबईसारख्या सतत धावणाऱ्या शहरासाठी ही सुविधा म्हणजे डिजिटल परिवर्तनाचं प्रतीक आहे. भविष्यात एमएमआरसी ही प्रणाली आणखी प्रगत करण्याच्या तयारीत असून, सीझन पास आणि डिजिटल वॉलेटसारखे पर्याय लवकरच उपलब्ध होण्याची शक्यता आहे.
तंत्रज्ञानाने सजलेली ही अॅक्वा लाईन आता केवळ प्रवासाचा मार्ग नाही, तर मुंबईकरांच्या दैनंदिन जीवनात येणाऱ्या बदलांची नवी दिशा ठरणार आहे. मुंबई मेट्रो 3 च्या या उपक्रमामुळे शहरातला प्रवास आता खऱ्या अर्थाने स्मार्ट, वेगवान आणि डिजिटल होणार आहे.
हेही वाचा: ONGC Recruitement 2025 : ओएनजीसीमध्ये 2 हजारहून अधिक Apprenticeship साठी मेगाभरती; अर्ज कुठे आणि कसा कराल?