नवी मुंबई आंतरराष्ट्रीय विमानतळावर प्रवासी विमान वाहतूक सुरू झाली असली, तरी विमानतळ परिसरातील मोबाईल नेटवर्कच्या समस्येने प्रवाशांना संकटात आणले आहे. विमानतळ प्रशासनाकडून प्रवाशांसाठी मोफत वाय-फायची सुविधा दिली जात असली, तरी मोबाईलला सिग्नलच नसल्याने प्रवाशांना साध्या कॉलपासून ते महत्त्वाच्या 'ओटीपी'पर्यंत अनेक अडचणींचा सामना करावा लागत आहे. विमानतळावर पाऊल ठेवताच प्रवाशांचे बाहेरील जगाशी असलेले डिजिटल संपर्क तुटत असल्याने प्रवाशांमध्ये संतापाचे वातावरण आहे.
या गंभीर समस्येचे मूळ दूरसंचार कंपन्या आणि विमानतळ प्रशासन यांच्यातील शुल्काच्या वादात अडकले आहे. रिलायन्स जिओ, एअरटेल आणि वोडाफोन-आयडिया या कंपन्यांनी सेवा देण्याची तयारी दर्शवली असली, तरी त्यांना स्वतःची स्वतंत्र पायाभूत सुविधा उभारण्यास मज्जाव करण्यात आला आहे. सेल्युलर ऑपरेटर असोसिएशन ऑफ इंडियाच्या (COAI) दाव्यानुसार, विमानतळ प्रशासन प्रत्येक कंपनीकडून दरमहा सुमारे 92 लाख रुपये इतके अवाढव्य भाडे मागत आहे. हे शुल्क व्यावसायिकदृष्ट्या परवडणारे नसल्याचे कंपन्यांचे म्हणणे आहे.
हेही वाचा: Beed Crime : बीड हादरलं! ऊसतोड मजुराच्या दोन चिमुकलींवर अत्याचार
दुसरीकडे, सुरक्षेच्या कारणास्तव दूरसंचार व्यवस्थेचे नियंत्रण स्वतःकडे ठेवणे आवश्यक असल्याचे समर्थन विमानतळ प्रशासनाने केले आहे. त्यांनी स्पष्ट केले की, आकारलेले शुल्क हे उद्योगातील मानकांनुसारच असून, 'इन-बिल्डिंग सोल्यूशन' (IBS) तंत्रज्ञानाचा वापर करून नेटवर्क उभारले जात आहे. खासगी कंपन्यांसोबतचा वाद सुरू असतानाच, आता सरकारी मालकीच्या BSNL कडून लवकरच नेटवर्क चाचणी सुरू होणार असल्याचे प्रशासनाकडून सांगण्यात आले आहे, ज्यामुळे प्रवाशांना काहीसा दिलासा मिळण्याची चिन्हे आहेत.
नेटवर्क नसल्याचा सर्वात मोठा फटका डिजिटल व्यवहारांना बसत आहे. आजच्या काळात टॅक्सी बुकिंग, ऑनलाइन तिकीट तपासणी आणि यूपीआय पेमेंट या गोष्टी दैनंदिन जीवनाचा भाग झाल्या आहेत. मात्र, सिग्नलअभावी प्रवाशांना विमानतळावरून बाहेर पडण्यासाठी टॅक्सी मिळवणे किंवा कॅब चालकाला पैसे देणे कठीण जात आहे. विशेषतः आंतरराष्ट्रीय प्रवाशांना विमानतळावर उतरल्यानंतर नातेवाईकांशी संपर्क साधताना मोठ्या अडथळ्यांना सामोरे जावे लागत आहे.
विमानतळ प्रशासनासाठी आता प्रवाशांना सुरक्षित, वेगवान आणि विनाव्यत्यय डिजिटल सेवा देणे हे एक मोठे आव्हान बनले आहे. जागतिक दर्जाच्या पायाभूत सुविधांचा दावा करणाऱ्या या विमानतळावर मूलभूत मोबाईल नेटवर्क नसणे, ही प्रवाशांच्या दृष्टीने मोठी उणीव ठरत आहे. या तणावामुळे आता प्रशासन आणि दूरसंचार कंपन्यांमधील चर्चेला वेग आला असून, तोडगा निघेपर्यंत प्रवाशांना या 'डिजिटल अंधारा'चा सामना करावा लागणार आहे.
प्रशासनाने तातडीने हस्तक्षेप करून दूरसंचार कंपन्यांशी समन्वय साधल्यास, आगामी काही दिवसांत ही समस्या मार्गी लागण्याची शक्यता वर्तवण्यात येत आहे.
