मुंबई: मुंबईकरांच्या जिव्हाळ्याचा विषय आणि विलेपार्ले रेल्वे स्थानक ओलांडताना येणारा तो बिस्किटांचा गोड, हवाहवासा वाटणारा सुगंध आता लवकरच इतिहासजमा होणार आहे. ज्या मातीत Parle-G या जागतिक स्तरावर ओळखल्या जाणाऱ्या बिस्किटाचा जन्म झाला, तो 97 वर्षांचा गौरवशाली वारसा आता आधुनिकतेची कास धरत आहे. विलेपार्ले (पूर्व) येथील पार्ले प्रॉडक्ट्सचा हा ऐतिहासिक कारखाना लवकरच पाडण्यात येणार असून, त्या जागी एक अद्ययावत आणि भव्य व्यावसायिक इमारत उभारण्याची योजना आखण्यात आली आहे.
2025 च्या प्रस्तावाला ग्रीन सिग्नल
मिळालेल्या माहितीनुसार, या पुनर्विकास प्रकल्पासाठी 2025 मध्ये सादर करण्यात आलेल्या प्रस्तावाला राज्य पर्यावरण परिणाम मूल्यांकन प्राधिकरणाने (SEIAA) 7 जानेवारी रोजी अंशतः मंजुरी दिली आहे. या निर्णयामुळे कारखान्याच्या परिसरातील 21 जुन्या आणि जीर्ण इमारती पाडण्याचा मार्ग मोकळा झाला आहे. मुंबईच्या उपनगरातील एका मोठ्या भूखंडाचे स्वरूप यामुळे पूर्णपणे पालटणार आहे. सुमारे 5.44 हेक्टर क्षेत्रफळाच्या या विस्तीर्ण जागेवर तब्बल 190,360.52 चौरस मीटर बांधकाम क्षेत्रासह हा प्रकल्प साकारला जाणार आहे.
3961 कोटींची मोठी गुंतवणूक
या महत्त्वाकांक्षी प्रकल्पासाठी पार्ले ग्रुप सुमारे 3961.39 कोटी रुपये इतकी प्रचंड गुंतवणूक करणार आहे. आराखड्यानुसार, या जागेवर चार प्रमुख इमारतींसह तीन आणि सहा मजल्यांचे दोन स्वतंत्र पार्किंग टॉवर्स उभारले जातील. जुने जाई, नवे येई या उक्तीप्रमाणे, जिथे एकेकाळी बिस्किटांची भट्टी धगधगत होती, तिथे आता जागतिक दर्जाची कार्यालये आणि व्यावसायिक केंद्रे उभी राहणार आहेत. या संकुलात किरकोळ दुकाने, रेस्टॉरंट्स आणि आधुनिक फूड कोर्ट्सचा समावेश असण्याची शक्यता आहे, ज्यामुळे विलेपार्लेकरांसाठी हे एक नवे आकर्षणाचे केंद्र ठरेल.
हेही वाचा: Georgia Shooting : अमेरिकेत भारतीय वंशाच्या व्यक्तीचे क्रूर कृत्य; तीन नातेवाईक आणि पत्नीवर झाडल्या गोळ्या
विमानतळ क्षेत्रातील ‘उंची’चे आव्हान
विमानतळाच्या जवळ असल्याने आणि हा भाग Air Funnel Zone मध्ये येत असल्यामुळे, भारतीय विमानतळ प्राधिकरणाने (AAI) उंचीवर कडक मर्यादा घातल्या आहेत. ऑक्टोबर 2025 मध्ये मिळालेल्या हरकत प्रमाणपत्रानुसार (NOC), एका इमारतीची उंची 30.40 मीटर, तर दुसऱ्याची 28.81 मीटर निश्चित करण्यात आली आहे. तांत्रिक कारणास्तव कंपनीने एका इमारतीसाठी 30.70 मीटर उंचीची मागणी केली असून, ही मर्यादा 0.30 मीटरने अधिक आहे. यावर सध्या संबंधित पातळीवर विचार सुरू आहे.
आधुनिक सुविधांनी सज्ज संकुल
प्रस्तावित चारही इमारतींना दोन स्तरांचे भव्य तळघर (Basement) असणार आहे. इमारत क्रमांक एकच्या B-Wing चा काही भाग व्यावसायिक वापरासाठी राखीव ठेवण्यात आला असून, त्यातील पहिला, सातवा आणि आठवा मजला दुकाने व कार्यालयांसाठी नियोजित आहे. उर्वरित मजल्यांवर पार्किंगची सुसंगत व्यवस्था करण्यात आली आहे. यामुळे या परिसरात येणाऱ्या नागरिकांसाठी वाहतूक आणि पार्किंगची समस्या निर्माण होऊ नये, याची विशेष काळजी घेण्यात आली आहे.
आठवणींचा पाऊलखुणा पुसल्या जाणार?
काळाच्या ओघात बदल अपरिहार्य असला, तरी मुंबईकरांच्या अनेक पिढ्यांसाठी पार्ले कारखाना म्हणजे केवळ एक उत्पादन केंद्र नव्हते, तर ती एक भावना होती. बालपणीच्या आठवणीत रेंगाळणारा तो बिस्किट बेकिंगचा सुगंध आता कायमचा लुप्त होणार आहे. 97 वर्षांचा हा प्रवास जरी थांबत असला, तरी या जागेवर उभ्या राहणाऱ्या नव्या वास्तूमुळे मुंबईच्या आर्थिक वैभवात नवी भर पडणार, हे मात्र निश्चित.
हेही वाचा: Navnath Ban On Sanjay Raut : 'संजय राऊत हे राहुल गांधींची नवरी...'; भाजप प्रवक्ते नवनाथ बन यांची राऊतांवर खोचक टीका