छत्रपती संभाजीनगर: एकीकडे मध्य पूर्वेतील आखाती देशांमध्ये युद्धाचे ढग दाटले असताना, त्याचे अनपेक्षित पडसाद थेट महाराष्ट्रातील पेट्रोल पंपांवर उमटताना दिसत आहेत. इस्रायल आणि इराण यांच्यातील संघर्षामुळे जागतिक स्तरावर कच्च्या तेलाची पुरवठा साखळी विस्कळीत होण्याची भीती व्यक्त केली जात आहे. मात्र, याच जागतिक तणावाचा आधार घेत सोशल मीडियावर पसरलेल्या एका 'इंधन टंचाईच्या' अफवेने सध्या राज्याच्या विविध शहरांत मोठी खळबळ उडवून दिली आहे. "पेट्रोल संपणार" किंवा "दरात 35 रुपयांनी वाढ होणार" या वावड्यांनी सर्वसामान्यांची झोप उडवली असून, पेट्रोल पंपांवर जणू काही कुंभमेळाच भरल्याचे चित्र पाहायला मिळत आहे.
मध्य पूर्वेतील परिस्थिती सध्या अत्यंत नाजूक आहे. अमेरिका आणि इस्रायलच्या इराणवरील हल्ल्यांनंतर आखाती देशांतील अमेरिकन लष्करी तळांवरही प्रत्याघात झाले आहेत. तेलवाहू जहाजांना लक्ष्य केले जात असल्याने जागतिक बाजारपेठेत चिंतेचे वातावरण आहे.
याच आंतरराष्ट्रीय घडामोडींचे भांडवल करून व्हॉट्सॲप आणि फेसबुकवर 'उद्यापासून पेट्रोल बंद होणार' असे दिशाभूल करणारे मेसेज व्हायरल झाले. या अफवेने इतका जोर धरला की, सुज्ञ नागरिकही शहानिशा न करता मिळेल त्या पेट्रोल पंपाच्या दिशेने धावू लागले आहेत.
हेही वाचा: Todays Horoscope : 'या' राशीच्या व्यक्तीं कला कौशल्यात मग्न राहतील तर काहींनी कामाच्या ठिकाणी वरीष्ठांचं राखावं मन, जाणून कसा आहे आजचा दिवस?
मराठवाड्यातील नांदेड, परभणी, हिंगोली आणि छत्रपती संभाजीनगर या शहरांमध्ये परिस्थिती सर्वाधिक गंभीर आहे. नांदेडमधील प्रसिद्ध 'बाबा पेट्रोल पंप' असो वा हिंगोलीतील मुख्य चौक, सर्वत्र वाहनांच्या रांगांनी रस्ते ओसंडून वाहत आहेत. विशेष म्हणजे, केवळ वाहनांच्या टाक्या फुल्ल करून लोक थांबत नसून, परभणीमध्ये तर चक्क बाटल्या आणि डबे घेऊन नागरिकांनी पंपांवर गर्दी केली आहे. "पुढच्या काही दिवसांत पेट्रोल मिळणार नाही," या भीतीपोटी लोकांमध्ये इंधन साठवून ठेवण्याची जणू स्पर्धाच लागली आहे.
छत्रपती संभाजीनगरमध्ये तर या अफवेचा फटका असा बसला की, प्रचंड गर्दीवर नियंत्रण मिळवणे कठीण झाल्याने काही पंप चालकांनी तात्पुरते पंप बंद ठेवणे पसंत केले. यामुळे नागरिकांच्या मनात भीतीचा गोळा आणखीनच मोठा झाला. मात्र, जिल्हा प्रशासन आणि पेट्रोल पंप असोसिएशनने ही भीती अनाठायी असल्याचे स्पष्ट केले आहे. "इंधनाचा पुरेसा साठा उपलब्ध असून पुरवठा साखळीत कोणताही खंड पडलेला नाही," असे आवाहन प्रशासनाकडून वारंवार केले जात आहे. तरीही, अफवेचा वणवा विझायला तयार नाही.
खरे तर, आंतरराष्ट्रीय स्तरावर कच्च्या तेलाचे दर वधारले तरी देशांतर्गत इंधन पुरवठा एका रात्रीत बंद होणे तांत्रिकदृष्ट्या अशक्य असते. मात्र, 'भीती' असल्याने नागरिक संभ्रमात आहेत. काही ठिकाणी तर पेट्रोल 35 रुपयांनी महागणार असल्याच्या अफवेने सामान्यांचे बजेट कोलमडण्याची भीती निर्माण केली आहे. या गोंधळामुळे केवळ इंधन टंचाईची भीतीच वाढली नाही, तर वाहतुकीची कोंडी होऊन जनजीवनही विस्कळीत झाले आहे.
शेवटी, युद्धाची धग आखाती देशात असली तरी अफवांची धग आपल्याकडे अधिक तीव्र होताना दिसतेय. नागरिकांनी कोणत्याही अपुऱ्या माहितीवर विश्वास न ठेवता संयम बाळगणे गरजेचे आहे. पेट्रोल पंप चालकांनी दिलेल्या माहितीनुसार, डिझेल आणि पेट्रोलचा साठा मुबलक आहे. त्यामुळे विनाकारण साठवणूक करून कृत्रिम टंचाई निर्माण करणे हे स्वतःच्याच पायावर धोंडा मारून घेण्यासारखे ठरेल. सोशल मीडियावरील 'फॉरवर्ड' मेसेजला बळी पडण्यापेक्षा अधिकृत सरकारी निवेदनाची प्रतीक्षा करणेच हिताचे ठरेल.
हेही वाचा: Donald Trump Statement: 'मीच इस्रायलला इराणवर हल्ला करायला लावला'; डोनाल्ड ट्रम्प यांचा खळबळजनक गौप्यस्फोट