बृहन्मुंबई महानगरपालिकासह 29 महानगरपालिका निवडणुकांसाठी काल म्हणजेच 15 जानेवारी रोजी मतदान प्रक्रिया पार पडली. तर शुक्रवार, 16 जानेवारी 2026 रोजी सकाळी 10 वाजल्यापासून विविध ठिकाणच्या 23 कक्षात मतमोजणी होणार आहे. त्याचसोबत पुणे महानगरपालिकेचे काल मतदान पार पडले ज्यामध्ये 52.42 टक्के मतदान झाले आहे. आज सकाळी 10 वाजल्यापासून मतमोजणीला सुरुवात होणार आहे. पुणे शहरात एकूण 15 ठिकाणी मतमोजणी होणार असून दुपारी 1 वाजेपर्यंत चित्र स्पष्ट होणार आहे. पुण्याचा कारभारी कोण याकडे सगळ्यांचेच लक्ष असून अजित पवार आणि मुरलीधर मोहोळ यांची प्रतिष्ठा पणाला लागलेली आहे. त्यासोबतच गणेश बिडकर,रवींद्र धंगेकर, वसंत मोरे, प्रशांत जगताप,अमोल बालवडकर, रूपाली पाटील यांच्या निकालाकडे ही सगळ्यांचेच लक्ष आहे. संपूर्ण मतमोजणी दरम्यान पोलिसांचा चोख पोलीस बंदोबस्त तैनात असणार आहे. पुणे महानगरपालिकेत 165 जागा असून यापैकी 2 जागा या बिनविरोध निवडून आल्या आहेत तर काल 163 जागांसाठी मतदान झाले आहे.