Ketan Agarwal Lohagad Case : पुण्यातील लोणावळ्याजवळील ऐतिहासिक लोहगड किल्ल्यावर ट्रेकिंगदरम्यान दरीत कोसळून झालेल्या केतन अग्रवाल या तरुणाच्या मृत्यू प्रकरणाला आता पूर्णपणे वेगळे वळण मिळाले आहे. सुरुवातीला हा एक दुर्दैवी अपघात असल्याचा अंदाज वर्तवला जात होता आणि लोणावळा ग्रामीण पोलिसांनी त्या दृष्टीनेच नोंद केली होती. मात्र, पोलीस तपासाची चक्रे फिरताच हा अपघात नसून एक थंड डोक्याने केलेला क्रूर खून असल्याचे समोर आले आहे. एका मोठ्या आणि नामांकित व्यावसायिकाच्या मुलाची अशा प्रकारे हत्या झाल्याचे उघडकीस आल्याने संपूर्ण पुणे जिल्ह्यात आणि ट्रेकर्स वर्तुळात प्रचंड खळबळ उडाली आहे.
तपासादरम्यान पोलिसांना आलेला संशय
ही धक्कादायक घटना 18 जून रोजी घडली होती, जेव्हा केतन अग्रवाल किल्ल्यावरून खाली कोसळल्याची माहिती पोलिसांना मिळाली. घटनेची माहिती मिळताच मयत केतन आणि त्याची होणारी पत्नी सिया गोयल यांचे कुटुंबीय तातडीने घटनास्थळी धावले होते. सुरुवातीला अपघाती मृत्यू वाटत असला तरी पोलिसांनी जेव्हा केतनच्या नातेवाईकांशी आणि मित्रांशी सखोल चर्चा केली, तेव्हा काही गोष्टी संशयास्पद वाटू लागल्या. केतन हा एक अत्यंत अनुभवी ट्रेकर होता आणि त्याने यापूर्वी अनेक कठीण गडकिल्ल्यांवर यशस्वीपणे ट्रेकिंग केले होते, त्यामुळे इतक्या सहजासहजी त्याचा पाय घसरून तो पडणे शक्यच नाही, असे सांगत त्याच्या कुटुंबीयांनी या प्रकाराबाबत संशय व्यक्त केला.
शेजारच्या दुकातील मुलासोबत प्रेमसंबंध आणि कट
कुटुंबीयांच्या संशयानंतर पोलिसांनी तांत्रिक पुरावे, मोबाईल लोकेशन्स आणि काही प्रत्यक्षदर्शी साक्षीदारांच्या मदतीने तपास अधिक तीव्र केला. या तपासात केतनची होणारी पत्नी सिया गोयल हिचा मित्र चेतन चौधरी याचे नाव पोलिसांच्या रडारवर आले. सियाच्या वडिलांचे जिथे दुकान किंवा व्यवसाय आहे, अगदी त्याच परिसरात चेतन चौधरीच्या कुटुंबाचाही व्यवसाय आहे. शेजारीच असल्याने मागील एका वर्षापासून सिया आणि चेतन एकमेकांना ओळखत होते आणि त्यांच्यात अत्यंत जवळचे प्रेमसंबंध निर्माण झाले होते. या प्रेमसंबंधांना केतनच्या रूपाने अडथळा येत असल्यानेच दोघांनी मिळून त्याला कायमचे संपवण्याचा कट रचला.
हेही वाचा – Beed Crime: 'माझ्या बहिणीशी तुझं लग्न…' आधी चाकूने सपासप वार, मग रॉडने बेदम मारहाण; बीड हादरलं
400 फूट दरीत ढकलून दिला जीव
ठरलेल्या कटानुसार, घटनेच्या दिवशी केतन आणि सिया हे दोघे लोहगड किल्ल्यावर फिरण्यासाठी आणि ट्रेकिंगसाठी गेले होते. यावेळी सियाचा प्रियकर चेतन चौधरी हा देखील त्यांच्यावर पाळत ठेवत मागून किल्ल्यावर पोहोचला. किल्ल्यावरील एका निर्जन आणि धोकादायक कड्यावर फिरत असताना, संधी साधून चेतन आणि सिया या दोघांनी मिळून केतनला मागून जोरात धक्का दिला. या जीवघेण्या धक्क्यामुळे केतनचा थेट 400 फूट खोल दरीत कोसळून जागीच मृत्यू झाला.
पोलिसांचा अधिकृत खुलासा
पोलीस अधिकारी संदीप सिंह गिल यांनी एका विशेष पत्रकार परिषदेत या संपूर्ण थरारक आणि खळबळजनक हत्याकांडाचा पर्दाफाश केला. पोलिसांनी दिलेल्या माहितीनुसार, सिया आणि चेतनने हा गुन्हा अतिशय हुशारीने अपघाताचा रंग देऊन लपवण्याचा प्रयत्न केला होता. मात्र, पोलिसांच्या कसून केलेल्या तपासापुढे आणि तांत्रिक पुराव्यांपुढे त्यांचा हा डाव फसला. लोणावळा ग्रामीण पोलिसांनी आता या प्रकरणी रीतसर खुनाचा (मर्डर) गुन्हा दाखल केला असून दोन्ही आरोपींना ताब्यात घेण्याची प्रक्रिया सुरू केली आहे.
याआधीही सियानं केला होता 'तो' प्रकार; पण केतन ओळखू शकला नाही
विशेष म्हणजे या घटनेआधी केतन अग्रवालसोबत एक विचित्र प्रकार घडला होता. तो सियासोबत इंडोनेशियातील बालीला प्री वेडींग शूट करण्यासाठी जाणार होता, मात्र त्याला मुंबई विमानतळावर आल्या पावली परतावं लागलं होतं. कारण जेव्हा केतन अग्रवाल विमानतळावर पोहोचला तेव्हा त्याला त्याचा पासपोर्ट सापडला नाही. पासपोर्टअभावी त्याला परत यावं लागलं. खरं तर, केतनचा पासपोर्ट सियानेच गायब केला होता. कारण, सियाला प्री वेडींग फोटोशूट करण्यासाठी बालीला जायचं नव्हतं आणि तिची हे लग्न करण्याचीही इच्छा नव्हती. सियाला केतनविषयी काहीही आपुलकी वाटत नव्हती याचे संकेत इथूनच मिळाले होते. मात्र केतन सियाला ओळखू शकला नाही. यानंतर या नात्याचा शेवट खूनात झाला. केतनला आपला जीव गमवावा लागला.
