Pune Water Cut: पुणे शहरातील विविध जलशुद्धीकरण केंद्रांवरील तातडीच्या विद्युत आणि तांत्रिक देखभाल-दुरुस्तीच्या कामामुळे पुणे महानगरपालिकेने मोठा निर्णय घेतला आहे. येत्या गुरुवार, दिनांक 16 एप्रिल रोजी संपूर्ण शहराचा पाणीपुरवठा बंद राहणार आहे. या नियोजित कामामुळे शुक्रवारी सकाळी देखील पाणीपुरवठा उशिरा आणि कमी दाबाने होण्याची शक्यता असल्याने नागरिकांनी आदल्या दिवशीच पाण्याचा पुरेसा साठा करून ठेवावा, असे आवाहन प्रशासनाकडून करण्यात आले आहे.
प्रमुख जलकेंद्रांवरील दुरुस्ती कामाचा फटका
महापालिकेच्या पाणीपुरवठा विभागाचे मुख्य अभियंता नंदकिशोर जगताप यांनी दिलेल्या माहितीनुसार, पर्वती जलशुद्धीकरण केंद्राच्या (Parvati Water Treatment Plant) अखत्यारीतील पर्वती, वडगाव, लष्कर, SNDT, वारजे आणि होळकर या पंपिंग स्टेशन्सवर महत्त्वाची विद्युत देखभाल आणि दुरुस्तीची कामे केली जाणार आहेत. या दुरुस्तीमुळे शहराच्या मध्यभागासह उपनगरांचाही पाणीपुरवठा खंडित होणार आहे.
बाधित होणारे मुख्य भाग आणि पेठा
पर्वती जलशुद्धीकरण केंद्राच्या कार्यक्षेत्रातील शहरातील सर्व जुन्या पेठा, दत्तावाडी, राजेंद्रनगर, लोकमान्य नगर, डेक्कन, शिवाजीनगर, स्वारगेट, पर्वती दर्शन, मुकुंदनगर, सहकारनगर, सातारा रस्ता, पद्मावती, बिबवेवाडी, तळजाई, कात्रज, धनकवडी आणि इंदिरा नगर या भागांत पाणी असणार नाही. तसेच कर्वे रस्त्यापासून SNDT पर्यंतचा पट्टा, एरंडवणे, कोथरूड, धनुकडे कॉलनी, कर्वेनगर, लॉ कॉलेज रस्ता आणि कोंढवा खुर्द येथील सर्व्हे क्रमांक 42 आणि 46 या परिसरातील पुरवठाही बंद राहील.
उपनगरांमध्येही पाणी कपात
वडगाव आणि वारजे जलशुद्धीकरण केंद्राच्या परिसरातील हिंगणे, आनंदनगर, धायरी, आंबेगाव पठार, पाषाण, औंध, बोपोडी, खडकी, चतुःश्रृंगी, गोखले नगर, जनवाडी, रेंज हिल्स, बावधन, बाणेर, चांदणी चौक आणि वारजे माळवाडी या भागांत पाणी मिळणार नाही. यासोबतच लष्कर जल केंद्राच्या अखत्यारीत येणारे पुणे स्टेशन, कोरेगाव पार्क, ताडीवाला रोड, रेसकोर्स, वानवडी, हडपसर, महंमदवाडी, मुळा रोड, येरवडा, कल्याणी नगर, वडगाव शेरी, चंदन नगर, खराडी आणि सोलापूर रस्ता या भागांतील पुरवठाही पूर्णपणे खंडित असेल.
महत्त्वाची सूचना
गुरुवार, 16 एप्रिल रोजी दिवसभर पाणी नसले तरी, शुक्रवारी सकाळी पुरवठा पूर्ववत होईल. मात्र, यंत्रणा पुन्हा सुरू होताना पाण्याचा दाब कमी राहण्याची शक्यता आहे. त्यामुळे शहरातील नागरिकांनी पाण्याचा वापर काटकसरीने करावा आणि पालिकेला सहकार्य करावे, अशी विनंती महापालिकेने केली आहे. टँकर भरणा केंद्रेही या काळात प्रभावित राहतील, याची नोंद नागरिकांनी घ्यावी.
