मुंबई: भारत आणि पाकिस्तानमधील युद्ध शिगेला असताना, या युद्धामध्ये तुर्की या देशाने भारताविरुद्धच्या युद्धात पाकिस्तानला पाठिंबा दिल्यामुळे आणि शस्त्रांची पुरवणी केल्यामुळे तुर्की या देशाविरोधात देशभरातून संताप व्यक्त केला जात आहे. तसेच, या पार्श्वभूमीवर मुंबई विमानतळावर शिवसेना शिंदे गटाने स्टाफ हँडलिंग या तुर्की कंपनीच्या विरोधात तीव्र निषेध सुरू केला आहे. शिवसेना शिंदे गटाने तुर्की कंपनी सेलेबी एनएएसवरही (Celebi NAS) देशविरोधी कारवायांमध्ये सहभागी असल्याचा आरोप केला. ही कंपनी मुंबई विमानतळावर ग्राउंड स्टाफ हँडलिंगचे काम करते.
ही कंपनी विशेषतः अशा लहान विमान कंपन्यांसाठी काम करते, ज्यांचे स्वतःचे ग्राउंड स्टाफ नाहीत. यामध्ये अकासा एअरलाइन्स, टार्किस एअरलाइन्स आणि इतर अनेक परदेशी एअरलाइन्स यांचा समावेश आहे. या कंपनीच्या विरोधात आंदोलन करणाऱ्या शिवसेनेच्या आमदार आणि इतर नेत्यांचे असे म्हणणे आहे की, 'ऑपरेशन सिंदूरविरोधात पाकिस्तानला तुर्कीने खुलेआम पाठिंबा दिला आहे. अशा परिस्थितीत हा देश आता भारताचा शत्रू देश बनला आहे. त्यामुळे, देशाची आर्थिक राजधानी म्हणून ओळखल्या जाणाऱ्या मुंबई येथील दोन विमानतळांवर शत्रू देशातील कंपनीला काम देता येणार नाही.'
ही कंपनी ग्राउंड स्टाफ हाताळते:
सेलेबी एनएएस नावाची ही तुर्की कंपनी (Celebi NAS) येथे अनेक विमान कंपन्यांसाठी ग्राउंड स्टाफ हाताळण्याचे काम करत आहे. हे कोणत्याही परिस्थितीत राष्ट्रीय हिताचे नाही. इतकंच नाही, तर शिवसेनेच्या मते, त्यांची मानसिकता पाकिस्तानी आहे आणि ही एकप्रकारची फसवी प्रवृत्ती आहे. भविष्यात ही कंपनी कधीही मुंबई विमानतळावर मोठी घटना घडवून आणू शकते. या युक्तिवादांसोबतच, शिवसेनेने या कंपनीचा करार रद्द करून तो भारतीय कंपनीला देण्यात यावी अशी मागणी केली आहे. दुपारी 12 वाजल्यापासून शिवसेना नेते मुंबईतील छत्रपती शिवाजी महाराज आंतरराष्ट्रीय विमानतळाच्या टर्मिनल 1 वर निदर्शने करत आहेत.
कंपनीला 10 दिवसांचा अल्टीमेटम:
यादरम्यान, शिवसेना शिंदे गटाचे आमदार आणि नेते विमानतळाच्या आत जाऊन विमानतळ प्राधिकरणाच्या अधिकाऱ्यांना भेटले आणि त्यांच्या मागण्या लेखी स्वरूपात मांडल्या. यामध्ये त्यांनी विमानतळ प्राधिकरणाला 10 दिवसांचा अल्टीमेटम दिला. 'जर या 10 दिवसांत सेलेबी एनएएसवरही (Celebi NAS) या तुर्की कंपनीचा करार रद्द केला नाही, तर संपूर्ण महाराष्ट्रात शिवसेनेकडून हिंसक निदर्शने आणि रस्ता रोको केला जाईल,' असा इशारा त्यांनी दिला आहे.
सेलेबी एनएएसवरही (Celebi NAS) या कंपनीच्या निषेधात शिवसेना शिंदे गटाचे आमदार मुरजी काका पटेल, आमदार मंगेश कुडाळकर आणि विभागप्रमुख कुणाल सरमळकर यांच्यासोबत मोठ्या संख्येने पक्षाचे कार्यकर्ते सहभागी झाले होते. यावेळी निदर्शकांनी 'देशाच्या सुरक्षेशी कोणतीही तडजोड केली जाणार नाही' आणि 'परदेशी कंपन्यांचा हस्तक्षेप थांबवा' अशा घोषणा दिल्या.