पुणे : लष्करात नोकरीच्या आमिषाने दोन तरुणांची चार लाख ८० हजार रुपयांची फसवणूक करण्यात आल्याचा प्रकार उघडकीस आला आहे. याप्रकरणी बंडगार्डन पोलिसांनी उत्तराखंडमधील मोहित रामसिंग धामी याच्याविरुद्ध गुन्हा दाखल केला आहे.
बंडगार्डन पोलीस ठाण्यात दिलेल्या फिर्यादीत म्हटले आहे की, फिर्यादीची ओळख गेल्या वर्षी मार्च महिन्यात एका परिचितामार्फत मोहित धामी याच्याशी झाली. त्यावेळी धामीने लष्करी रुग्णालयात नोकरी करीत असल्याचा बनाव केला. त्याने फिर्यादी व त्याच्या मित्राला लष्करात नोकरी लावण्याचे आमिष दाखवून त्यांच्याकडून मोठी रक्कम उकळली.
धामीने फिर्यादीकडून दोन लाख ८० हजार रुपये व त्याच्या मित्राकडून दोन लाख रुपये असे एकूण चार लाख ८० हजार रुपये घेतले. त्यानंतर त्यांनी नोकरीबाबत विचारणा केली असता धामीने वारंवार टाळाटाळ केली. अखेर फसवणूक झाल्याचे लक्षात आल्यानंतर त्यांनी बंडगार्डन पोलीस ठाण्यात तक्रार दाखल केली.
बंडगार्डन पोलिसांनी तातडीने गुन्हा दाखल करून तपास सुरू केला आहे. मोहित रामसिंग धामी याने आणखी कुणाची फसवणूक केली आहे का, याचा तपासही सुरू आहे. तरुणांची फसवणूक करून पैसे उकळणाऱ्या या प्रकरणामुळे अनेक तरुणांना धडा मिळाला आहे. पोलिसांनी तरुणांनी अशा आमिषांना बळी न पडण्याचे आवाहन केले आहे. पुढील तपास बंडगार्डन पोलीस करत आहेत.
