छत्रपती संभाजीनगर : जिल्ह्यात दुचाकी चोरी करणाऱ्या सराईत चोरट्याला पोलिसांनी रविवारी बीड बायपास परिसरातून अटक केली. गुन्हे शाखेच्या पथकाने केलेल्या या कारवाईत चोरी केलेल्या सहा दुचाकी हस्तगत करण्यात आल्या. अंबर ऊर्फ बाळू विठ्ठल देवकर (वय २८, रा. फरशी फाटा, ता. फुलंब्री, जि. छत्रपती संभाजीनगर) असे अटक केलेल्या आरोपीचे नाव आहे. विशेष म्हणजे, चोरी केलेल्या दुचाकी तो चक्क छावणी स्मशानभूमीत लपवत होता.
पोलिस गस्त घालत असताना त्यांना दुचाकी चोरणाऱ्या टोळीबद्दल माहिती मिळाली. त्यानुसार, बीड बायपास परिसरात सापळा लावण्यात आला. संशयित एका हॉटेल परिसरात फिरताना आढळून आला. पोलिसांनी त्याला ताब्यात घेऊन कसून चौकशी केली असता, त्याने सहा दुचाकी चोरी केल्याची कबुली दिली. त्याने दुचाकी लपवण्यासाठी निवडलेल्या ठिकाणाविषयी ऐकून पोलिसही चकित झाले.
पोलिसांनी छावणी स्मशानभूमी गाठली असता, तेथे अडगळीत सहा दुचाकी आढळल्या. त्यांची अंदाजे किंमत सुमारे ५ लाख ४० हजार रुपये आहे. स्मशानभूमीच्या एकांत वातावरणाचा फायदा घेत त्याने ही दुचाकी लपविल्या होत्या. स्मशानात फारसे कोणी येत नाहीत, त्यामुळे पोलिसही चोरीसंदर्भात चौकशी करणार नाहीत, असा त्याचा अंदाज होता. याशिवाय, घाटी रुग्णालयाच्या शवविच्छेदन गृहाबाहेरही त्याने काही दुचाकी ठेवल्याचे समोर आले आहे.
व्यसनासाठी करायचा दुचाकी चोरी
अंबर ऊर्फ बाळू हा सराईत गुन्हेगार असून, तो जिल्ह्याच्या विविध भागांतून दुचाकी चोरण्याचा सुकाळ करत होता. त्याला व्यसन असल्याने खर्च भागवण्यासाठी तो वारंवार चोऱ्या करत होता. पोलिसांनी त्याने अन्य किरकोळ चोरीच्या घटनांमध्येही सहभाग असल्याचा संशय व्यक्त केला आहे. पुढील तपास सुरू असून, या गुन्ह्यात आणखी कोणी सामील आहे का, याचा शोध घेतला जात आहे.
