जळगाव: जळगाव शहरात घडलेल्या विनयभंगाच्या घटनेला अनेक दिवस उलटले असतानाही संबंधित आरोपीवर गुन्हा दाखल न झाल्याने महिलांमध्ये तीव्र नाराजी आहे. या प्रकरणात न्याय मिळावा, यासाठी पीडित महिला आणि इतर महिलांनी एकत्र येत जिल्हाधिकारी कार्यालयावर धडक दिली.
पीडितेच्या समर्थनार्थ आज दुपारी महिलांनी जिल्हाधिकारी कार्यालयाबाहेर जोरदार निदर्शने केली. गुन्हा दाखल झालाच पाहिजे, पीडितेला न्याय मिळालाच पाहिजे, अशा जोरदार घोषणा देत महिलांनी आपला संताप व्यक्त केला. या आंदोलनात स्थानिक महिलांसह सामाजिक संघटनांचे प्रतिनिधी देखील सहभागी झाले होते.
संबंधित घटनेबाबत महिलांनी सांगितले की, पीडित महिलेला सार्वजनिक ठिकाणी विनयभंगाचा त्रास सहन करावा लागला. ती धाडस करून पोलिस ठाण्यात पोहोचली, तक्रार दिली, मात्र त्यावर अद्याप कोणतीही ठोस कारवाई झाली नाही. पोलिसांनी केवळ चौकशी सुरू असल्याचे सांगून वेळकाढूपणा केला आहे, असा आरोप महिलांनी केला.
पीडित महिलेने माध्यमांशी बोलताना सांगितले की, मी वेळेवर तक्रार दिली, सर्व पुरावे दिले, तरीही पोलिसांकडून मला केवळ आश्वासन मिळाले. गुन्हा दाखल झाल्याशिवाय मला न्याय मिळणार नाही. त्यामुळेच आज इतर महिलांबरोबर मी रस्त्यावर उतरले आहे.
सोलापुरात हृदयद्रावक घटना : चालत्या रेल्वेवर दगडफेक; चार वर्षांच्या चिमुकलीचा दुर्दैवी मृत्यू
या निषेध आंदोलनानंतर महिलांनी जिल्हाधिकाऱ्यांना निवेदन दिले. निवेदनात त्यांनी पोलिस प्रशासनाविरोधात तीव्र नाराजी व्यक्त करत, तात्काळ गुन्हा दाखल करून आरोपीवर कठोर कारवाई करण्यात यावी, अशी मागणी केली. निवेदन स्विकारल्यानंतर जिल्हाधिकारी कार्यालयातील अधिकाऱ्यांनी याची दखल घेतली असून पोलिस प्रशासनाशी चर्चा करून योग्य ती कारवाई केली जाईल, असे आश्वासन दिले.
दरम्यान, जळगाव पोलिसांनी यावर प्रतिक्रिया देताना सांगितले की, तक्रारीची चौकशी सुरू आहे. सर्व बाजू तपासूनच पुढील निर्णय घेण्यात येईल. मात्र महिलांचे म्हणणे आहे की, हे आश्वासन अनेक दिवसांपासून ऐकले जात आहे, प्रत्यक्षात काही घडत नाही.
या प्रकरणामुळे जळगावमध्ये महिला सुरक्षेचा प्रश्न पुन्हा ऐरणीवर आला आहे. पोलिस प्रशासनाच्या कार्यपद्धतीवर प्रश्नचिन्ह उभे राहिले असून, पीडित महिलेला न्याय मिळेपर्यंत आंदोलने सुरू राहतील, असा इशारा आंदोलक महिलांनी दिला आहे.
