मुंबई : प्रथमच मुंबई महानगरपालिकेकडून 426 घरांच्या विक्रीसाठी जाहिरात प्रसिद्ध करण्यात आली आहे. या सोडतीसाठी 16 ऑक्टोबरपासून अर्ज स्वीकारण्यास सुरुवात होणार आहे. विकास नियंत्रण व प्रोत्साहन नियमावली-2034 च्या विनियम 15 व 33 (20) (ब) अन्वये प्राप्त सदनिकांसाठी सोडत काढण्यात येत आहे. मुंबई महानगरपालिका आयुक्त तथा प्रशासक भूषण गगराणी यांच्या निर्देशांनुसार ही प्रक्रिया राबविण्यात येत आहे. विकास नियंत्रण व प्रोत्साहन नियमावली – 2034 च्या विनियम 15 व 33 (20) (ब) अन्वये प्राप्त 426 घरांच्या विक्रीसाठी पालिकेकडून 16 ऑक्टोबर 2025 ते 21 नोव्हेंबर 2025 या कालावधीत प्रक्रिया राबविण्यात येणार आहे. अत्यल्प आणि अल्प गटासाठी या सदनिका उपलब्ध असणार आहेत.
या सदनिकांच्या विक्रीसाठी मुंबई महानगरपालिकेच्या https://bmchomes.mcgm.gov.in या वेबसाईटवरुन अर्ज मागविण्यात येत असून 16 ऑक्टोबर 2025 रोजी सकाळी 10 वाजेपासून ऑनलाईन अर्ज विक्री आणि स्वीकृतीची प्रक्रिया सुरू होणार आहे. तसेच अर्जदारांना 14 नोव्हेंबर 2025 रोजी सायंकाळी 5 वाजेपर्यंत अर्ज भरता येणार आहेत. तर, अर्ज शुल्क आणि अनामत रक्कम 14 नोव्हेंबर 2025 रात्री 11.59 वाजेपर्यंत स्वीकारण्यात येईल. पात्र अर्जदारांची अंतिम यादी 18 नोव्हेंबर 2025 रोजी सायंकाळी 5 वाजता जाहीर करण्यात येईल. तर सोडत प्रक्रिया 20 नोव्हेंबर 2025 रोजी सायंकाळी 5 वाजता पार पडेल. या सोडतीतून निवड झालेल्या यशस्वी आणि प्रतीक्षा यादीवरील अर्जदारांची नावे 21 नोव्हेंबर 2025 रोजी सायंकाळी 5 वाजता वेबसाईटवर प्रसिध्द करण्यात येईल. या सोडतीसंदर्भातील माहिती पुस्तिका 16 ऑक्टोबर 2025 रोजी सकाळी 10 वाजेपासून वेबसाईटवर उपलब्ध होईल. प्रक्रियेसंदर्भातील विविध प्रकारची माहिती तसेच अटी व शर्तींबाबत पुस्तिकेमध्ये माहिती देण्यात आलेली आहे. या प्रक्रियेतील सदनिकांसंदर्भात आवश्यक बदल करण्याचा अधिकार मुंबई महानगरपालिका आयुक्त यांच्याकडे आहेत.
दरम्यान, या सोडतीसंदर्भात माहिती व मदतीसाठी 022-22754553 या मदतसेवा क्रमांकावर किंवा bmchomes@mcgm.gov.in या ईमेल आयडीवर संपर्क साधण्याचे आवाहन पालिकेच्यावतीने करण्यात आले आहे. किंवा ‘सहाय्यक आयुक्त (मालमत्ता), चौथा मजला, विस्तारित इमारत, बृहन्मुंबई महानगरपालिका मुख्यालय, महापालिका मार्ग, मुंबई – 400 001’ या पत्त्यावर कार्यालयीन कामकाजाच्या दिवशी आणि कार्यालयीन कामकाजाच्या वेळेत संपर्क साधावा, असेही प्रशासनाकडून कळविण्यात आले आहे.
