Supriya Sule onAsha Bhosle: राष्ट्रवादी काँग्रेस (शरदचंद्र पवार गट) नेत्या सुप्रिया सुळे यांनी आशा भोसले यांच्या निधनानंतर मंगेशकर कुटुंबासोबत असलेल्या जुन्या आठवणींना उजाळा दिला आहे. “माझ्या बालपणापासूनच मंगेशकर आणि पवार कुटुंबांमधील दृढ कौटुंबिक संबंधांचा मी साक्षीदार राहिले आहे,” अशा शब्दांत त्यांनी आपल्या भावना व्यक्त केल्या. हा देश आशा दीदी, लता दीदी आणि उषा दीदी यांचा आवाज ऐकतच मोठा झाला असून, त्या केवळ महान गायिका नव्हत्या तर आपल्या कुटुंबातीलच एक सदस्य वाटत असतं, असेही सुळे यांनी नमूद केले.
चैतन्याचा झरा आणि असीम उत्साह
आशा दीदींच्या व्यक्तिमत्त्वाबद्दल बोलताना सुप्रिया सुळे म्हणाल्या की, त्यांच्या ठायी सदैव असीम उत्साह ओसंडून वाहत असे. त्यांना कधीही रागावलेले किंवा थकलेले पाहिले नाही. उलट, त्यांचा चेहरा नेहमीच आनंदाने प्रफुल्लित असे. अवघ्या तीन-चार महिन्यांपूर्वीच एका कार्यक्रमात त्यांची भेट घेण्याचे भाग्य लाभले होते. वयाची नव्वदी ओलांडलेली असतानाही त्यांच्या वयाची जाणीव कधीच होत नसे; त्या नेहमीप्रमाणेच टवटवीत आणि उत्साही दिसत असत, अशा आठवणी त्यांनी यावेळी सांगितल्या.
प्रेरणादायी व्यक्तिमत्त्व आणि भावपूर्ण श्रद्धांजली
“एका महान कलाकाराचे खरे लक्षण हेच असते की, त्यांच्या भेटीतून समोरच्या व्यक्तीला नेहमी ऊर्जा आणि प्रेरणा मिळते,” असे सुप्रिया सुळे यांनी आवर्जून सांगितले. आशा दीदींची भेट नेहमीच नवी उमेद देऊन जायची. त्यांच्या निधनामुळे संगीत क्षेत्राची आणि वैयक्तिकरित्या पवार कुटुंबाची मोठी हानी झाली आहे. माझ्या कुटुंबाच्या आणि माझ्या पक्षाच्या वतीने मी त्यांना भावपूर्ण श्रद्धांजली अर्पण करते, अशा शब्दांत सुळे यांनी आपल्या संवेदना व्यक्त केल्या.
