Supriya Sule: महाराष्ट्रात ओढवलेल्या नैसर्गिक संकटामुळे निर्माण झालेल्या गंभीर परिस्थितीवर राष्ट्रवादी काँग्रेस (शरदचंद्र पवार) पक्षाच्या राष्ट्रीय कार्याध्यक्षा आणि खासदार सुप्रिया सुळे यांनी तीव्र चिंता व्यक्त केली आहे. मुंबई आणि पुण्यात यापूर्वीही मुसळधार पाऊस झाला आहे, मात्र संपूर्ण जनजीवन इतक्या मोठ्या प्रमाणावर ठप्प होण्याची ही पहिलीच वेळ असल्याचे त्यांनी म्हटले आहे. मुंबई-पुणे संपर्क पूर्णपणे तुटल्याने आणि मानखुर्द दुर्घटनेसह अनेक ठिकाणी जीवित-वित्तहानी झाल्याच्या पार्श्वभूमीवर, मुख्यमंत्री देवेंद्र फडणवीस यांनी वेळ न गमावता राज्यात तात्काळ आणीबाणी जाहीर करावी, अशी आग्रही मागणी सुप्रिया सुळे यांनी केली आहे.
‘मिसिंग लिंक’ प्रकल्पाच्या सुरक्षेवर प्रश्नचिन्ह; चौकशीची मागणी
मोठ्या थाटामाटात उद्घाटन झालेल्या ‘मिसिंग लिंक’ प्रकल्पाच्या सद्यस्थितीचे व्हिडिओ अत्यंत धक्कादायक आणि चिंताजनक असल्याचे सुप्रिया सुळे यांनी नमूद केले. अब्जावधी रुपयांचा निधी खर्च करूनही पहिल्याच मोठ्या पावसात या प्रकल्पाची दुरवस्था का झाली, असा सवाल त्यांनी उपस्थित केला आहे. या प्रकल्पाचे काम करताना ‘सेफ्टी ऑडिट’ झाले होते का? आणि नैसर्गिक आपत्तींचा अंदाज घेऊन याचे नियोजन केले होते का? याची पारदर्शक चौकशी गृहराज्य किंवा मुख्यमंत्र्यांनी करावी, अशी मागणी त्यांनी केली. तसेच वसई-विरार, भांडूप आणि मुंबईतील इतर विकासकामांमध्ये पर्यावरण आणि सुरक्षिततेचे निकष धाब्यावर बसवले गेल्याचा आरोपही त्यांनी केला.
एकाच पावसाने महाराष्ट्र पॅरालाइज झाला; विरोधकांचा सत्ताधाऱ्यांवर हल्लाबोल
मुंबई-पुणे एक्सप्रेसवे, जुना महामार्ग आणि ताम्हिणी घाट यांसारखे 3 प्रमुख मार्ग एकाच वेळी बंद पडल्याने दोन्ही महत्त्वाची शहरे एकमेकांपासून वेगळी झाली आहेत. आळंदीतील पूर आणि रेल्वे सेवेच्या बोजवाऱ्यामुळे संपूर्ण राज्य एकाच पावसाने ‘पॅरालाइज’ झाले आहे. अशा बिकट परिस्थितीत रुग्ण, डॉक्टर, विद्यार्थी आणि अत्यावश्यक सेवांमधील कर्मचाऱ्यांचे प्रचंड हाल होत असून, सरकारने राज्यातील खरी वस्तुस्थिती जनतेसमोर मांडावी, असे आवाहन सुळे यांनी केले.
मुंबई-पुण्यासह अनेक भागात सध्या मुसळधार पाऊस सुरु आहे. यामुळे शहरांमध्ये अनेक ठिकाणी जनजीवन विस्कळीत झाले आहे. वाहतूकीची कोंडी होत असून यामुळे नागरीकांना मोठा त्रास सहन करावा लागत आहे. माझी शासनाला विनंती आहे की, पुण्यातील राजीव गांधी इन्फोटेक पार्कसह पावसाचा तडाखा बसलेल्या… — Supriya Sule (@supriya_sule) July 6, 2026
संसदेत आणि ‘इंडिया’ आघाडीच्या बैठकीत आवाज उठवणार
सत्ताधारी पक्षाचे नेते केवळ विरोधकांना लक्ष्य करण्यात आणि राजकीय कारवायांमध्ये व्यस्त असल्याचा टोला सुप्रिया सुळे यांनी लगावला. सरकारचे आपत्ती व्यवस्थापनाकडे पूर्णपणे दुर्लक्ष झाल्यामुळेच जनतेवर ही वेळ आली आहे. यासोबतच, प्रभू श्रीराम हे देशाच्या श्रद्धेचे स्थान असून, तेथील विकासकामांमध्ये झालेल्या कथित भ्रष्टाचाराची सखोल चौकशी व्हावी, अशी मागणी त्यांनी केली. हा सर्व मुद्दा आगामी संसदेच्या अधिवेशनात ‘इंडिया’ (INDIA) आघाडीच्या वतीने अत्यंत ताकदीने मांडला जाईल, असेही त्यांनी स्पष्ट केले.
