Shekhar Gore : पश्चिम महाराष्ट्राच्या राजकीय पटलावर पुन्हा एकदा मोठ्या राजकीय घडामोडी घडताना दिसत आहेत. सातारा जिल्ह्यातील वजनदार नेते आणि सातारा जिल्हा मध्यवर्ती सहकारी बँकेचे संचालक शेखर गोरे यांनी उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याचा पक्का निर्णय घेतला आहे. या संभाव्य पक्षप्रवेशामुळे त्यांचे बंधू तथा राज्याचे ग्रामविकास मंत्री जयकुमार गोरे यांच्यासह भारतीय जनता पक्षाला मोठा धक्का बसल्याचे मानले जात आहे. गेल्या विधानसभा निवडणुकीत जयकुमार गोरे यांना विजयी करण्यात शेखर गोरे यांची अत्यंत कळीची भूमिका राहिली होती. आता त्यांनीच वेगळी चूल मांडल्याने माण-खटाव मतदारसंघातील राजकीय गणिते पूर्णपणे बदलण्याची चिन्हे आहेत.
विधानपरिषदेच्या शब्दावरून नाराजीची चर्चा; गोरेंनी धरली वेगळी वाट
गेल्या काही महिन्यांपासून शेखर गोरे आणि भाजप नेतृत्वातील अंतर्गत मतभेद चव्हाट्यावर येत होते. विधानपरिषद निवडणुकीच्या वेळी पक्षश्रेष्ठींकडून मिळालेला शब्द पाळला न गेल्याने गोरे अत्यंत नाराज असल्याचे त्यांच्या निकटवर्तीयांकडून सांगितले जात होते. या राजकीय उपेक्षेला उत्तर म्हणून अखेर त्यांनी शिंदेंच्या शिवसेनेचा भगवा हाती घेण्याचे निश्चित केले आहे. या राजकीय पक्षांतरामुळे आगामी स्थानिक स्वराज्य संस्थांच्या निवडणुका आणि भविष्यातील विधानसभा शर्यतीमध्ये भाजपसमोर मोठे आव्हान उभे ठाकणार आहे.
पश्चिम महाराष्ट्रात शिवसेनेची ताकद वाढणार; आगामी निवडणुकांवर दूरगामी परिणाम
शेखर गोरे यांच्या या निर्णयामुळे माण आणि खटाव या दोन्ही तालुक्यांमध्ये शिवसेनेचे पक्षसंघटन अधिक मजबूत होण्याची शक्यता आहे. एकेकाळी बंधूच्या पाठीशी खंबीरपणे उभे राहणारे शेखर गोरे आता थेट विरोधकांच्या गोटात सामील होत असल्याने साताऱ्यातील राजकारण ढवळून निघाले आहे. एकनाथ शिंदे यांनी भाजपच्याच एका प्रभावी नेत्याला आपल्या बाजूने वळवून महायुतीतील अंतर्गत ताकद दाखवून दिल्याची चर्चा राजकीय वर्तुळात रंगली आहे. आता या राजकीय भूकंपानंतर मंत्री जयकुमार गोरे कोणती नवी रणनीती आखतात, याकडे संपूर्ण जिल्ह्याचे लक्ष लागले आहे.
