बारामतीतील श्री सोमेश्वर सहकारी साखर कारखान्याची 62 वी वार्षिक सर्वसाधारण सभा सोमवार, 21 सप्टेंबर रोजी होणार आहे. मात्र, या सभेच्या पार्श्वभूमीवर कारखान्याच्या वार्षिक अहवालातील एका गोष्टीवरून राजकीय वातावरण तापण्याची शक्यता निर्माण झाली आहे. अहवालात राष्ट्रवादी काँग्रेसचे नेते पार्थ पवार यांचा फोटो नसल्याचा मुद्दा चर्चेत आला आहे.
कारखान्याची पंचवार्षिक निवडणूक प्रक्रिया सुरू असतानाच ही वार्षिक सभा होत असल्याने सभेकडे सभासद आणि राजकीय वर्तुळाचे विशेष लक्ष लागले आहे. उपलब्ध माहितीनुसार, सभेत मागील वर्षाच्या कामकाजाचा आढावा, आर्थिक अहवाल तसेच विविध प्रशासकीय आणि आर्थिक विषयांवर चर्चा होणार आहे.
या पार्श्वभूमीवर वार्षिक अहवालामध्ये पवार कुटुंबातील इतर नेत्यांचे फोटो असताना पार्थ पवार यांचा फोटो नसल्याचा मुद्दा उपस्थित करण्यात आला आहे. अहवालात दिवंगत अजित पवार, ज्येष्ठ नेते शरद पवार, खासदार सुप्रिया सुळे आणि उपमुख्यमंत्री सुनेत्रा पवार यांचे फोटो असल्याचे सांगण्यात आले आहे.
शेतकरी कृती समितीचे नेते सतीश काकडे यांनी यावरून कारखाना प्रशासनावर टीका केली आहे. “कारखान्याच्या विद्यमान अध्यक्षांना पार्थ पवारांचा फोटो अहवालात घेण्याची लाज वाटत असेल किंवा पार्थ पवारांना ते आपल्या लेव्हलचे समजत नसतील,” असा टोला त्यांनी लगावला आहे.
दरम्यान, सोमेश्वर सहकारी साखर कारखान्याची आगामी निवडणूक पार्थ पवार यांच्या नेतृत्वाखाली लढवली जाणार असल्याचा दावा या चर्चेतून पुढे आला आहे. त्यामुळे अहवालातून त्यांचा फोटो वगळल्याचा मुद्दा सभेत उपस्थित होण्याची शक्यता व्यक्त केली जात आहे.
सोमेश्वर कारखान्याच्या निवडणुकीमुळे बारामतीतील सहकार क्षेत्रातील राजकीय वातावरण आधीच तापले आहे. यंदाची निवडणूक दिवंगत अजित पवार यांच्या निधनानंतर होणारी पहिली मोठी सहकारी संस्थेची निवडणूक असल्याने तिच्याकडे विशेष लक्ष आहे. विविध राजकीय गटांकडून निवडणुकीसाठी मोर्चेबांधणी सुरू आहे आणि मोठ्या संख्येने इच्छुकांनी उमेदवारी अर्ज दाखल केले आहेत.
अशा परिस्थितीत वार्षिक अहवालातील फोटोचा मुद्दा सभेत उपस्थित झाल्यास त्यावरून आरोप-प्रत्यारोप होण्याची शक्यता आहे. सभासदांकडून कोणते प्रश्न उपस्थित केले जातात आणि कारखाना प्रशासन त्यावर काय स्पष्टीकरण देते, याकडे आता लक्ष लागले आहे.
विशेष म्हणजे, निवडणुकीच्या पार्श्वभूमीवर होणाऱ्या या सभेमुळे सोमेश्वर कारखान्यातील राजकीय समीकरणांवरही चर्चा रंगली आहे. त्यामुळे पार्थ पवारांचा फोटो अहवालातून का वगळण्यात आला? आणि हा मुद्दा सभेत किती तापतो, हे पाहणे महत्त्वाचे ठरणार आहे.
