प्रदीप पुर्णेकर प्रकरणात मोठा ट्विस्ट! मारेकरी शिंदे गटाच्या माजी महापौरांच्या इमारतीत? संजय राऊतांचा खळबळजनक दावा

Sanjay Raut: ठाण्यातील शिवसेना (ठाकरे गट) विभाग प्रमुख प्रदीप उर्फ बाळू पूर्णेकर यांच्या मृत्यूनंतर स्थानिक राजकारणात मोठा उद्रेक पाहायला मिळत आहे. या प्रकरणी बाळू पूर्णेकर यांचे सुपुत्र राम पूर्णेकर यांनी अत्यंत धक्कादायक खुलासे करत शिंदे गटाच्या ज्येष्ठ नेत्या आणि माजी महापौर मिनाक्षी शिंदे तसेच त्यांचे पती राजेंद्र शिंदे यांच्यावर गंभीर संशय व्यक्त केला आहे. राम पूर्णेकर यांच्या थेट तक्रारीनंतर ठाणे पोलिसांनी या प्रकरणात पुरवणी FIR नोंदवून दोन्ही नेत्यांच्या नावांचा समावेश केला आहे. गुन्ह्याच्या दोन दिवसांपूर्वीच संशयित मारेकरी मिनाक्षी शिंदे राहत असलेल्या निलकंठ टॉवरच्या आवारात शिरताना दिसले होते, असा दावा राम पूर्णेकर यांनी पोलिसांकडे केला आहे. खासदार संजय राऊत यांनी पत्रकार परिषदेत या सर्व घडामोडींची माहिती देत सत्ताधाऱ्यांवर कडाडून हल्ला चढवला.

हेही वाचा – मोठी बातमी! स्व.अजित पवारांच्या अपघातासंदर्भात रोहित पवारांचा जळगावात मोठा दावा, म्हणाले ‘तो’ नेता राज्यातीलच..

राऊत-आदित्य ठाकरेंची ठाण्यात धाव

खासदार संजय राऊत आणि आमदार आदित्य ठाकरे यांनी काल ठाण्यात जाऊन दिवंगत पूर्णेकर यांच्या कुटुंबीयांची भेट घेऊन त्यांचे सांत्वन केले. या दरम्यान त्यांनी सहपोलीस आयुक्त ज्ञानेश्वर चव्हाण, उपायुक्त प्रशांत कदम आणि इतर वरिष्ठ अधिकाऱ्यांशी प्रदीर्घ चर्चा केली. राजकीय किंवा प्रशासकीय दबावाला बळी न पडता निष्पक्ष तपास करण्याचे आश्वासन पोलिसांनी ठाकरे गटाच्या नेताओंना दिले आहे. या हत्येप्रकरणी आतापर्यंत 2 आरोपींना पोलिसांनी बेड्या ठोकल्या असून, भक्कम पुराव्यांच्या आधारे न्यायालयात बाजू मांडली जाईल, असे आश्वासन पोलीस आयुक्तांनी दिले आहे.

ठाण्याची अवस्था बिकट झाल्याची टीका

प्रदीप पूर्णेकर यांनी परिसरातील ड्रग्ज माफियांविरोधात आणि स्थानिक क्लस्टर विकासातील गैरव्यवहारांविरोधात मोठी मोहीम उघडली होती. तसेच त्यांनी मिनाक्षी शिंदे यांच्याविरोधात निवडणूकही लढवली होती. याच राजकीय वैमनस्यातून त्यांच्यावर 7 गोळ्या झाडण्यात आल्याचे राऊत यांनी नमूद केले. “ठाण्याची सध्याची अवस्था अत्यंत चिंताजनक बनली असून येथे गुंडगिरीचे साम्राज्य निर्माण झाले आहे,” असा टोला लगावताना राऊत यांनी राज्याचे गृहमंत्री देवेंद्र फडणवीस यांच्या कार्यक्षमतेवर प्रश्नचिन्ह उपस्थित केले. तसेच भाजपचे स्थानिक आमदार संजय केळकर आणि भाजपच्या माजी उपमहापौरांनीही याप्रकरणी पोलीस प्रशासनाला पत्र लिहून योग्य तपासाची मागणी केल्याचा दावा राऊत यांनी केला.