सातारा जिल्हा बँकेच्या निवडणुकीत राजकीय घडामोड; खासदार उदयनराजे भोसले यांची सलग दुसऱ्यांदा बिनविरोध निवड
सातारा जिल्हा मध्यवर्ती सहकारी बँकेच्या (DCC Bank) आगामी निवडणुकीच्या पार्श्वभूमीवर जिल्ह्याच्या राजकीय वर्तुळात एक मोठी आणि महत्त्वपूर्ण घडामोड समोर आली आहे. भारतीय जनता पक्षाचे खासदार छत्रपती उदयनराजे भोसले यांची जिल्हा बँकेच्या संचालकपदी सलग दुसऱ्यांदा बिनविरोध निवड झाली आहे. त्यांनी गृहनिर्माण आणि दुग्ध संस्था या विशिष्ट मतदारसंघातून आपला उमेदवारी अर्ज दाखल केला होता. त्यांच्या विरोधात रिंगणात असलेले उमेदवार ज्ञानेश्वर पवार यांनी छत्रपतींच्या गादीचा सन्मान आणि आदर राखून आपला अर्ज मागे घेतल्याचे जाहीर केले. त्यामुळे उदयनराजे यांच्या बिनविरोध निवडीचा मार्ग मोकळा झाला. या विजयानंतर त्यांच्या समर्थकांनी ‘जलमंदिर पॅलेस’ या निवासस्थानी एकत्र येत उदयनराजेंचे पुष्पगुच्छ देऊन जल्लोषात स्वागत केले.
उदयनराजेंच्या निवडीने राजकीय समीकरणे बदलली
सातारा जिल्हा मध्यवर्ती बँकेच्या एकूण 21 जागांसाठी निवडणूक प्रक्रिया पार पडत आहे. छाननीनंतर प्राप्त झालेल्या 236 अर्जांपैकी 224 अर्ज वैध ठरले आहेत. परंतु, निवडणुकीच्या सुरुवातीलाच खासदार उदयनराजे यांची बिनविरोध निवड झाल्यामुळे जिल्ह्यातील राजकीय समीकरणांना नवी दिशा मिळाली आहे. उल्लेखनीय म्हणजे, उदयनराजे हे दुसऱ्यांदा या बँकेवर संचालक म्हणून निवडून आले असून, दोन्ही वेळा त्यांनी याच मतदारसंघातून बिनविरोध बाजी मारण्याची किमया साधली आहे.
हेही वाचा – ‘हिंमत असेल तर मला अटक करून दाखवा…’; अभिजित दीपकेंचं पोलीस प्रशासनाला खुलं आव्हान
‘बँकेत वैयक्तिक स्वार्थ नाही, शेतकरी व सर्वसामान्यांची सेवा हेच उद्दिष्ट;’ उदयनराजेंची प्रतिक्रिया
आपल्या बिनविरोध निवडीनंतर प्रसारमाध्यमांशी बोलताना खासदार उदयनराजे भोसले यांनी सहकार क्षेत्रातील सद्यस्थितीवर भाष्य केले. सहकार चळवळ ही सर्वसामान्य जनतेसाठी सुरू झाली होती, मात्र आज त्याचा विसर पडत चालला आहे, असे ते म्हणाले. “सातारा जिल्हा बँक ही देशात नावारूपाला आली असून तिला अनेक पुरस्कार मिळाले आहेत. बँकेत मला कोणत्याही पदाची लालसा किंवा वैयक्तिक स्वार्थ नसून, शेतकरी, कष्टकरी आणि उपेक्षित घटकांचा विकास करणे हाच माझा मुख्य उद्देश आहे,” असे त्यांनी स्पष्ट केले. तसेच दुष्काळामुळे निवडणुका पुढे ढकलण्याबाबतचा निर्णय शासन पातळीवर घेतला जाईल, असेही त्यांनी नमूद केले.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.