मुंबई: राजकारणात वरवर शांत दिसणाऱ्या तळ्याच्या तळाशी अनेकदा खळबळ माजलेली असते. सध्या ‘ऑपरेशन टायगर’च्या चर्चांनी राजकीय वर्तुळ ढवळून निघाले असतानाच, शिवसेना (उद्धव बाळासाहेब ठाकरे) पक्षाच्या गोटातून एक अत्यंत खळबळजनक माहिती समोर आली आहे.
पक्षप्रमुख उद्धव ठाकरे यांनी बोलावलेल्या खासदारांच्या महत्त्वपूर्ण बैठकीत अचानक अंतर्गत वादाचा मोठा स्फोट झाला. ‘मातोश्री’वर पार पडलेल्या या बैठकीत नेहमीच्या शांततेचा भंग करत चक्क पक्षप्रमुखांच्या बोलण्यात हस्तक्षेप करण्याची वेळ आल्याने ठाकरे गटातील अंतर्गत धुसफूस आता चव्हाट्यावर आली आहे.
या बैठकीत राज्यसभेच्या आगामी निवडणुका आणि इतर राजकीय घडामोडींच्या पार्श्वभूमीवर मंथन सुरू होते. काँग्रेसचे राष्ट्रीय अध्यक्ष मल्लिकार्जुन खर्गे आणि के. सी. वेणुगोपाल यांच्याशी झालेल्या चर्चेचा तपशील उद्धव ठाकरे खासदारांना देत होते. महाविकास आघाडीत, विशेषतः शिवसेना आणि राष्ट्रवादी काँग्रेसमध्ये कोणताही बेबनाव होऊ नये, यासाठी अत्यंत सावध पावले उचलत असल्याचे ठाकरे स्पष्ट करत होते.
मात्र, याच दरम्यान खासदार प्रियांका चतुर्वेदी यांनी आक्रमक पवित्रा घेत थेट पक्षप्रमुखांनाच सवाल केला. “मला आक्षेप नोंदवायचा आहे. संजय राऊत यांनी शरद पवार यांच्याबाबत असे विधान का केले?” असा अनपेक्षित आणि तिखट प्रश्न त्यांनी विचारला. त्यांच्या या थेट हस्तक्षेपामुळे बैठकीतील वातावरण एका क्षणात तापले.
प्रियांका चतुर्वेदी यांच्या या आक्रमक भूमिकेवर उद्धव ठाकरे यांनीही तितक्याच रोखठोक शब्दांत त्यांची भूमिका स्पष्ट केली. चतुर्वेदींचा आक्षेप फेटाळून लावत त्यांनी संजय राऊत यांची थेट पाठराखण केली. “संजय राऊत बोलले म्हणून काय झाले? या पक्षाचा प्रमुख मी आहे आणि यासंदर्भातील अंतिम निर्णय मीच घेणार,” अशा स्पष्ट शब्दांत ठाकरेंनी चतुर्वेदींना सुनावले. या प्रसंगामुळे पक्षात अंतिम शब्द पक्षप्रमुखांचा असल्याचे आणि राऊत यांच्या विधानांना अप्रत्यक्ष पाठिंबा असल्याचे त्यांनी अधोरेखित केले.
या खडाजंगीनंतर बैठकीत दबक्या आवाजात अनेक चर्चांना उधाण आले. बैठक संपल्यानंतर मराठवाड्यातील एका ज्येष्ठ खासदाराने थेट प्रियांका चतुर्वेदी यांच्या पक्षातील उपयुक्ततेवरच प्रश्नचिन्ह उपस्थित केले. “गेली सहा वर्षे त्यांना पक्षात मोठी संधी देऊन नेमका काय उपयोग झाला?” असा संतप्त सवाल या खासदाराने उद्धव ठाकरेंना विचारल्याची माहिती सूत्रांनी दिली आहे. यामुळे मूळ शिवसैनिक विरुद्ध आयात नेते हा पक्षांतर्गत छुपा संघर्ष पुन्हा एकदा ऐरणीवर आला असल्याचे स्पष्ट झाले.
या महत्त्वपूर्ण बैठकीचे आणखी एक वैशिष्ट्य म्हणजे युवानेते आदित्य ठाकरे यांची उपस्थिती आणि त्यांचे सूचक मौन. उद्धव ठाकरे यांना प्रकृतीच्या कारणास्तव राज्यभर दौरे करण्यावर काही मर्यादा आहेत. अशा स्थितीत आदित्य ठाकरे यांनी संपूर्ण महाराष्ट्र पिंजून काढणे अपेक्षित असताना ते राज्यभर का फिरत नाहीत, अशी तक्रार यापूर्वी संजय राऊत यांच्या निवासस्थानी झालेल्या खासदारांच्या बैठकीत उघडपणे करण्यात आली होती. मात्र ‘मातोश्री’वरील या ताज्या बैठकीत आदित्य ठाकरे पूर्ण वेळ उपस्थित असूनही त्यांनी खासदारांशी कोणताही संवाद साधला नाही. त्यांचे हे मौन अनेक राजकीय अर्थांना जन्म देणारे ठरले आहे.
एकूणच, आगामी निवडणुकांचे वारे वेगाने वाहत असताना आणि महाविकास आघाडीत जागावाटपावरून रस्सीखेच सुरू असताना ठाकरे गटातील ही अंतर्गत धुसफूस पक्षासाठी चिंतेचा विषय ठरू शकते. एका बाजूला मित्रपक्षांशी समन्वय साधण्याचे मोठे आव्हान आणि दुसऱ्या बाजूला पक्षांतर्गत नेत्यांमधील विसंवाद व नाराजी अशा दुहेरी कात्रीत सध्या उद्धव ठाकरे सापडले आहेत. यातून मार्ग काढत ते पक्षाची मोट कशी बांधून ठेवतात, हे पाहणे राजकीयदृष्ट्या अत्यंत औत्सुक्याचे ठरणार आहे.
