Angaraki Sankashti Chaturthi in Pitru Paksha 2026: यंदाच्या पितृपक्षात (Pitru Paksha 2026) एक अत्यंत दुर्मिळ आणि फलदायी धार्मिक योग जुळून आला आहे. मंगळवारी, 29 सप्टेंबर रोजी अंगारकी संकष्ट चतुर्थी येत असून, याच दिवशी ‘भरणी श्राद्ध’ आणि तृतीया तिथीदेखील आहे. मंगळवारी येणाऱ्या संकष्टीला ‘अंगारक योग’ म्हटले जात असल्याने या दिवसाचे आध्यात्मिक महत्त्व कैक पटींनी वाढले आहे. विघ्नहर्ता श्रीगणेशाची उपासना करून संकटांतून मुक्ती मिळवण्यासोबतच पूर्वजांचे स्मरण करून त्यांचे आशीर्वाद प्राप्त करण्याची ही सुवर्णसंधी भाविकांना मिळणार आहे.
अंगारकी संकष्टी चतुर्थी आणि चंद्रोदयाची अचूक वेळ
संकष्टी चतुर्थीचे व्रत हे रात्री चंद्राचे दर्शन घेऊन अर्घ्य दिल्यानंतरच परिपूर्ण मानले जाते. मंगळवार 29 सप्टेंबर या दिवशी चंद्रोदयाची वेळ रात्री 8:14 वाजता आहे.
व्रतपूर्ती पद्धत: चंद्रोदयानंतर चंद्राला जल, अक्षता, गंध आणि फुले वाहून अर्घ्य अर्पण करावे. त्यानंतर श्रीगणेशाची भावपूर्ण आरती करून उपवास सोडावा.
मंगळ दोष निवारणासाठी कशी करावी बाप्पाची शास्त्रोक्त पूजा?
अंगारकी संकष्टीच्या दिवशी केलेली गणपतीची विशेष उपासना कुंडलीतील मंगळ दोष शांत करणारी आणि कर्जाच्या समस्येतून मुक्ती देणारी मानली जाते. या दिवशी पूजेची पद्धत अशी असावी:
अभिषेक अन् शेंदूर: सकाळी लवकर स्नान करून बाप्पाला पंचामृत व शुद्ध पाण्याने अभिषेक घालावा. तसेच लाल चंदन (रक्तचंदन) किंवा शेंदूर अर्पण करावा.
21 दुर्वांची जुडी: बाप्पाला अत्यंत प्रिय असलेली 21 दुर्वांची जुडी ‘ॐ गं गणपतये नमः’ किंवा संकष्टनाशन गणपती स्तोत्राचा जप करत अर्पण करावी.
नैवेद्य व पठण: गूळ-खोबरे, मोदक किंवा लाडवांचा नैवेद्य दाखवून दिवसभरात संकष्टनाशन गणेश स्तोत्र किंवा अथर्वशीर्षाचे पठण करावे.
भरणी श्राद्ध आणि संकष्टी उपवासाचा ताळमेळ कसा साधावा?
एकाच दिवशी संकष्टीचा उपवास आणि ‘भरणी श्राद्ध’ आल्याने नैवेद्य व पूजेबाबत धर्मशास्त्रानुसार योग्य समन्वय साधणे गरजेचे आहे:
दुपारच्या वेळेत श्राद्धकर्म: पितरांच्या तृप्तीसाठी दुपारच्या वेळेत (अपराह्न काळात) शास्त्रोक्त तर्पण आणि भरणी श्राद्धाचे विधी पूर्ण करावेत.
पितरांसाठी संपूर्ण अन्न: घरातील सदस्यांचा उपवास असला तरी पितरांचा नैवेद्य फराळाचा नसावा; तो नेहमीप्रमाणे डाळ, भात, भाजी, खीर व पुरी असा संपूर्ण अन्नाचाच असावा.
पंचबली व उपवास सोडणे: श्राद्धाचा नैवेद्य प्रथम गाय, कावळा आणि कुत्र्याला द्यावा. उपवास असणाऱ्या व्यक्तीने अन्नाचा फक्त सुवास (घ्राणं अर्धभोजनम्) घ्यावा. रात्री 8:14 वाजता चंद्रोदयानंतर अर्घ्य देऊन श्राद्धाचे अन्न ‘पितरांचा महाप्रसाद’ म्हणून ग्रहण करत उपवास सोडावा.
समृद्धी आणि शांतीसाठी अंगारकीचे विशेष धार्मिक महत्त्व
विघ्नहर्त्या श्रीगणेशाच्या कृपेने आयुष्यातील सर्व संकटांचे निवारण व्हावे आणि पूर्वजांच्या आशीर्वादाने कुटुंबात सुख, शांती व समृद्धी नांदावी यासाठी हा अंगारकीचा पावन दिवस अत्यंत लाभदायी ठरेल. शास्त्रानुसार अंगारकी संकष्टीचे व्रत व गणरायाचे मनोभावे पूजन केल्याने साधकाच्या सर्व पवित्र इच्छा पूर्ण होतात.
हेही वाचा – Kitchen Tips: फ्रीजमध्ये चुकूनही ठेवू नका ‘हे’ 7 पदार्थ; चव आणि गुणवत्ता दोन्ही बदलू शकते..
