ODI World Cup 2027: क्रिकेट चाहत्यांसाठी एक अत्यंत आनंदाची आणि मोठी बातमी समोर आली आहे. पुढील वर्षी होणाऱ्या 2027 च्या एकदिवसीय (ODI) विश्वचषकाचे काऊंटडाऊन सुरू झाले असून, या मेगा स्पर्धेच्या संभाव्य तारखा समोर आल्या आहेत. ही स्पर्धा ऑक्टोबर आणि नोव्हेंबर दरम्यान खेळवली जाणार हे आधीच स्पष्ट झाले होते, मात्र आता त्याच्या विशिष्ट तारखांचा खुलासा झाला आहे. आयसीसी (ICC) लवकरच याचे अधिकृत वेळापत्रक जाहीर करणार असून, जुलै महिन्यात होणाऱ्या आयसीसीच्या वार्षिक सर्वसाधारण सभेत (AGM) यावर अंतिम शिक्कामोर्तब होण्याची शक्यता आहे.
तीन देशांमध्ये रंगणार थरार; 4 ऑक्टोबरपासून होणार सुरुवात
पुढील वर्षीचा एकदिवसीय विश्वचषक दक्षिण आफ्रिका, झिम्बाब्वे आणि नामिबिया यांच्या संयुक्त यजमानपदाखाली खेळवला जाणार आहे. 'ESPN Cricinfo' ने दिलेल्या अहवालानुसार, ही स्पर्धा 4 ऑक्टोबर ते 21 नोव्हेंबर 2027 या कालावधीत आयोजित केली जाऊ शकते. गेल्या मे महिन्यात अहमदाबादमध्ये झालेल्या आयसीसीच्या महत्त्वपूर्ण बैठकीत या तारखांवर एकमत झाले होते. या स्पर्धेत सह-यजमान म्हणून ३ देश असले, तरीही स्पर्धेतील बहुतांश प्रमुख सामने दक्षिण आफ्रिकेतील 8 मैदानांवर खेळवले जाण्याची शक्यता आहे.
एकूण 54 सामने; दक्षिण आफ्रिकेत रंगणार सर्वाधिक मॅचेस
दरम्यान, 2027 च्या आयसीसी एकदिवसीय विश्वचषकात एकूण 54 सामने खेळवले जातील, ज्यामुळे ही स्पर्धा दीर्घकाळ आणि थरारक ठरेल. नियोजनानुसार, यापैकी तब्बल 41 सामने एकट्या दक्षिण आफ्रिकेत होणार आहेत. याशिवाय, झिम्बाब्वेला 8 ते 10 सामन्यांचे यजमानपद दिले जाऊ शकते, ज्यासाठी तिथली 3 मैदाने शॉर्टलिस्ट करण्यात आली आहेत. तर नामिबियाच्या वाट्याला 3 सामने येण्याची शक्यता आहे. विशेष म्हणजे, ऐतिहासिक 2003 च्या विश्वचषकानंतर पहिल्यांदाच दक्षिण आफ्रिकेत आयसीसी वर्ल्ड कपचे आयोजन केले जात आहे.
14 संघांचा सहभाग आणि 'सुपर सिक्स' फॉरमॅटचे पुनरागमन
या आगामी विश्वचषकाचे सर्वात मोठे वैशिष्ट्य म्हणजे यात तब्बल 14 संघ जेतेपदासाठी परस्परांशी भिडतील. भारत सरकारने यशस्वी आयोजन केलेल्या 2023 च्या विश्वचषकात केवळ 10 संघ सहभागी झाले होते, मात्र आता ही संख्या वाढवण्यात आली आहे. या स्पर्धेत सर्व 14 संघांची विभागणी प्रत्येकी 7 संघांच्या 2 गटात केली जाईल. यानंतर, क्रिकेट चाहत्यांना पुन्हा एकदा ऐतिहासिक 'सुपर सिक्स' (Super Six) फॉरमॅट पाहायला मिळणार आहे, जो 2003 च्या विश्वचषकात वापरला गेला होता. दक्षिण आफ्रिका आणि झिम्बाब्वेने सह-यजमान म्हणून आपले स्थान आधीच निश्चित केले आहे, तर नामिबियाला आयसीसीचा 'पूर्ण सदस्य' नसल्यामुळे पात्रता फेरी (Qualifiers) पार करावी लागणार आहे.
