IPL 2026 Schedule: जगभरातील क्रिकेट चाहत्यांचे लक्ष लागून असलेल्या इंडियन प्रीमियर लीग (IPL 2026) च्या आगामी हंगामाबाबत बीसीसीआयने महत्त्वाची माहिती दिली आहे. आयपीएलच्या पहिल्या 20 दिवसांचे वेळापत्रक पुढील दोन ते तीन दिवसांत जाहीर केले जाणार असल्याची घोषणा बीसीसीआयचे सचिव देवजित लोन सैकिया यांनी केली आहे. ‘एएनआय’ या वृत्तसंस्थेशी बोलताना त्यांनी ही माहिती दिली.
निवडणुकांच्या तारखांचा विचार करून निर्णय
देशातील काही राज्यांमध्ये होणाऱ्या विधानसभा निवडणुका आणि आयपीएलच्या तारखा एकाच वेळी येत असल्याने वेळापत्रक निश्चित करताना बीसीसीआय सावध पवित्रा घेत आहे. “ज्या राज्यांमध्ये निवडणुका होणार आहेत, तिथल्या तारखांचा आम्ही सखोल विचार करत आहोत. सुरक्षेचा प्रश्न आणि स्थानिक प्रशासनावर येणारा ताण लक्षात घेऊनच वेळापत्रक तयार केले जात आहे,” असे सैकिया यांनी स्पष्ट केले.
हेही वाचा – Cricket News : मोठी बातमी समोर! 28 वर्षांची प्रतीक्षा संपवणाऱ्या ‘त्या’ दिग्गजावर आता मोठी जबाबदारी
We will announce the first 20 days' schedule of IPL in the next two-three days, after considering the dates for the election-bound states: BCCI Secretary Devajit Lon Saikia to ANI. (file photo) pic.twitter.com/3wNMwK0Z9O — ANI (@ANI) March 10, 2026
दोन टप्प्यात येणार वेळापत्रक
निवडणुकीच्या पार्श्वभूमीवर, बीसीसीआय संपूर्ण हंगामाचे वेळापत्रक एकदाच जाहीर न करता ते टप्प्याटप्प्याने प्रसिद्ध करण्याची शक्यता आहे. सुरुवातीच्या 20 दिवसांच्या वेळापत्रकानंतर, निवडणुकांचा नेमका कार्यक्रम स्पष्ट झाल्यावर उर्वरित सामन्यांच्या तारखा आणि ठिकाणांची घोषणा केली जाईल. यामुळे चाहत्यांना आणि फ्रँचायझींना सुरुवातीच्या सामन्यांचे नियोजन करणे सोपे होणार आहे.
