Hardik Pandya: भारतीय क्रिकेट संघाचा अष्टपैलू खेळाडू हार्दिक पांड्याने आपल्या क्रिकेट कारकिर्दीच्या पुढील प्रवासासाठी एक मोठा आणि महत्त्वपूर्ण निर्णय घेतला आहे. हार्दिक पांड्याने आता मुंबई सोडून अधिकृतपणे बंगळूरुमध्ये स्थलांतर केले आहे. बीसीसीआयच्या (BCCI) नव्याने उभारण्यात आलेल्या 'सेंटर ऑफ एक्सलन्स'ला (COE) त्याने आपले कायमस्वरूपी प्रशिक्षण केंद्र बनवण्याचा निर्णय घेतला आहे. आपल्या कारकिर्दीसाठी अशा प्रकारे सेंटर ऑफ एक्सलन्सचा नियमित तळ म्हणून वापर करणारा हार्दिक हा सध्याचा पहिलाच आघाडीचा भारतीय क्रिकेटपटू ठरला आहे.
मुंबईच्या प्रवासाला कंटाळला; COE जवळच घेतले घर
हार्दिक पांड्या मूळचा गुजरात मधील बडोद्याचा असला, तरी गेल्या 10 वर्षांपासून तो मुंबईत स्थायिक होता. प्रामुख्याने तो मुंबई इंडियन्सच्या घणसोली येथील सुविधेत सराव करायचा. मात्र, मुंबईतील लोअर परेल येथील आपल्या निवासस्थानावरून सरावासाठी दररोज ये-जा करणे ट्रॅफिकमुळे अत्यंत त्रासदायक ठरत होते. त्यामुळे हार्दिकला मुंबईबाहेर पडून शांत ठिकाणी सराव करायचा होता. यासाठी त्याने बंगळूरु शहराच्या बाहेरील भागात, 'सीओई' सुविधेच्या अगदी जवळ एक जागा भाड्याने घेतली असून तो तिथे राहण्यास गेला आहे. बीसीसीआयच्या केंद्रीय करारात समाविष्ट असल्यामुळे त्याला या केंद्रातील दुखापत व्यवस्थापनापासून ते कौशल्य प्रशिक्षणापर्यंतच्या सर्व जागतिक दर्जाच्या सुविधांचा विनामूल्य लाभ मिळणार आहे.
दुखापतीतून सावरण्यासाठी 'सीओई' ठरले उपयुक्त
सध्या हार्दिक पांड्या क्वाड्रिसेप्सच्या (मांडीच्या स्नायूंच्या) दुखापतीशी झगडत आहे. याच दुखापतीमुळे तो सध्या सुरू असलेल्या युनायटेड किंगडमच्या (UK) मर्यादित षटकांच्या दौऱ्याला मुकला आहे. गेल्या 6 महिन्यांत हार्दिकने आपला बहुतांश वेळ याच सेंटर ऑफ एक्सलन्समध्ये फिटनेस मिळवण्यासाठी घालवला आहे. जेव्हा जेव्हा तो आयपीएल, देशांतर्गत क्रिकेट किंवा राष्ट्रीय संघाच्या सामन्यांमध्ये व्यस्त नसेल, तेव्हा तो बंगळूरुमधील याच केंद्रात सराव करताना दिसेल.
आणखी 5-6 वर्षे खेळण्याचा मानस; स्वतःचे प्रशिक्षकही सोबत असणार
हार्दिक पांड्या जोपर्यंत भारतासाठी मर्यादित षटकांचे (व्हाईट-बॉल) क्रिकेट खेळत आहे, तोपर्यंत त्याचा मुक्काम बंगळूरुमध्येच असेल. आगामी किमान आणखी 5 ते 6 वर्षे आंतरराष्ट्रीय क्रिकेट खेळण्याचा त्याचा विचार आहे. बीसीसीआयच्या सुविधेव्यतिरिक्त, हार्दिकच्या वैयक्तिक सरावावर लक्ष ठेवण्यासाठी त्याचा स्वतःचा वैयक्तिक फिजिओथेरपिस्ट आणि एक स्ट्रेंथ अँड कंडिशनिंग (S&C) प्रशिक्षक देखील त्याच्यासोबत बंगळूरुमध्ये कार्यरत असेल. विशेष म्हणजे, मैदानावर सराव करताना बीसीसीआयने नियुक्त केलेल्या नेट बॉलर्सविरुद्ध फलंदाजी करताना, हार्दिक त्या गोलंदाजांना स्वतःच्या खिशातून मानधन देतो, अशी माहिती बीसीसीआयच्या सूत्रांनी दिली आहे.
झिम्बाब्वे मालिकेतील पुनरागमनाबाबत अद्याप अनिश्चितता
हार्दिक पांड्या वैयक्तिक कारणांमुळे काही दिवसांच्या विश्रांतीनंतर तो पुढील 1 ते 2 दिवसांत पुन्हा एकदा 'सीओई'मध्ये दाखल होणार आहे. बीसीसीआयच्या 'रिटर्न-टू-प्ले' प्रोटोकॉलनुसार तो पूर्णपणे तंदुरुस्त घोषित झाल्यास त्याचे मैदानावर पुनरागमन होईल. तथापि, युके दौऱ्यानंतर लगेचच होणाऱ्या झिम्बाब्वेविरुद्धच्या 3 सामन्यांच्या टी-20 आंतरराष्ट्रीय मालिकेसाठी त्याची निवड होणार की नाही, याबाबत अद्याप निवड समितीकडून कोणतीही स्पष्टता देण्यात आलेली नाही.
