लवलीनाची वाढदिवसाला देशाला शानदार भेट; आशियाई क्रीडा स्पर्धेत कोरलं सुवर्णपदकावर नाव

Lovlina Borgohain: भारतीय मुष्टियाद्धा (बॉक्सर) लवलीना बोरगोहेनने आशियाई क्रीडा स्पर्धेत उत्कृष्ट कामगिरी करत सुवर्णपदकाला गवसणी घातली आहे. महिलांच्या 75 किलो वजनी गटातील रोमहर्षक अंतिम सामन्यात तिने चीनच्या बाओ झियीचा धुव्वा उडवला. विशेष म्हणजे, आज 2 ऑक्टोबर रोजी आपला वाढदिवस साजरा करत असलेल्या लवलीनाने या ऐतिहासिक विजयासह संपूर्ण देशाला सुवर्णपदकाची अनोखी भेट दिली आहे. संपूर्ण सामन्यात आपल्या चिनी प्रतिस्पर्ध्यावर वर्चस्व गाजवत तिने हा विजय साकारला. यापूर्वी हांगझोऊ आशियाई क्रीडा स्पर्धेत अंतिम फेरीत निसटता पराभव झाल्यामुळे तिचे सुवर्णपदक हुकले होते; मात्र यावेळी तिने कसून सराव करत सुवर्णपदकावर आपले नाव कोरले.

पहिल्या फेरीपासून लवलीनाचा संयम आणि आक्रमकतेचा मेळ

चीनच्या बाओ झियीविरुद्धच्या सुवर्णपदकाच्या लढतीत सुरुवातीला चिनी बॉक्सर अधिक आक्रमक चाली खेळताना दिसली. मात्र, ऑलिम्पिक पदक विजेत्या लवलीनाने अत्यंत संयम दाखवत योग्य संधी मिळताच अचूक पंच मारले. अत्यंत चुरशीच्या ठरलेल्या पहिल्या फेरीत लवलीनाने 3-2 अशी निसटती पण महत्त्वाची आघाडी घेतली. दुसऱ्या फेरीतही दोन्ही बॉक्सर्समध्ये जोरदार टक्कर झाली, परंतु लवलीनाने आपल्या अनुभवाचा पुरेपूर वापर करत ही फेरी 4-1 अशी जिंकली आणि सामन्यात 2-0 अशी भक्कम आघाडी मिळवली.

#WATCH | Nagoya, Japan | Indian boxer Lovlina Borgohain, who won a gold medal in the women’s 75kg category at the Asian Games 2026 today, celebrates her birthday with fellow athletes in the presence of Ajay Singh, President of the Boxing Federation of India pic.twitter.com/aCqIiYimET — ANI (@ANI) October 2, 2026

तिसऱ्या फेरीत एकतर्फी विजय अन् सुवर्णपदकावर मोहर

पहिल्या दोन फेऱ्यांमध्ये आघाडी घेतल्यानंतर लवलीनाने तिसऱ्या फेरीत प्रतिस्पर्ध्याला पुनरागमन करण्याची कोणतीही संधी दिली नाही. तिने आपला वेग आणि आक्रमकता कायम ठेवत तिसरी फेरी 5-0 अशा फरकाने खिशात घातली. या निर्णायक कामगिरीच्या जोरावर तिने एकतर्फी विजय मिळवत सुवर्णपदकावर आपले नाव कोरले. यापूर्वी राष्ट्रकुल क्रीडा स्पर्धेत तिला रौप्यपदकावर समाधान मानावे लागले होते, त्या अपयशाची कसर तिने या आशियाई क्रीडा स्पर्धेत भरून काढली आहे.

हेही वाचा – 14 संघ…दोन गट…मैदानावरचा थरार! अखेर ICC पुरुष क्रिकेट विश्वचषक 2027 विश्वचषकाचे वेळापत्रक जाहीर

भारताच्या पदकांचा टप्पा 70 वर

लवलीना बोरगोहेनच्या या ऐतिहासिक कामगिरीमुळे भारतीय खेळाडूंचा आत्मविश्वास द्विगुणीत झाला आहे. तिच्या या विजयानंतर आता क्रीडाप्रेमींचे लक्ष महिला मुष्टियोद्धा परवीन आणि पुरुष मुष्टियोद्धा अंकुश यांच्या आगामी सुवर्णपदकाच्या लढतींकडे लागले आहे. या सुवर्णपदकासह आशियाई क्रीडा स्पर्धेत भारताची एकूण पदकांची संख्या 70 वर पोहोचली असून, त्यात सुवर्णपदकांची संख्या 12 झाली आहे. लवलीनाच्या या यशाबद्दल देशभरातून तिच्यावर शुभेच्छांचा वर्षाव होत आहे.