Shubman Gill Injured: भारत-वेस्ट इंडिज मालिकेपूर्वी भारतीय संघाला मोठा धक्का; सरावादरम्यान कर्णधार शुभमन गिल दुखापतग्रस्त

Shubman Gill Injured: भारत आणि वेस्ट इंडिज दरम्यान रंगणाऱ्या आगामी एकदिवसीय मालिकेला अवघे 2 दिवस शिल्लक असताना भारतीय संघाचा कर्णधार शुभमन गिल सराव सत्रादरम्यान दुखापतग्रस्त झाल्याची धक्कादायक माहिती समोर आली आहे. नेट्समध्ये फलंदाजीचा सराव करत असताना वेगवान गोलंदाज मोहम्मद सिराजने टाकलेला एक जलद चेंडू गिलच्या उजव्या कोपरावर जोरदार आदळला. चेंडू लागताच गिल वेदनेने विव्हळला आणि त्याने सराव अर्धवट सोडून मैदानाबाहेर जाणे पसंत केले. या घटनेमुळे बीसीसीआयच्या (BCCI) वैद्यकीय पथकाची चांगलीच पळापळ झाली. वैद्यकीय अधिकाऱ्यांनी तात्काळ त्याच्यावर उपचार केले. सुदैवाने, थोड्या विश्रांतीनंतर शुभमन पुन्हा हसतमुखाने मैदानात परतल्याने भारतीय क्रीडाप्रेमी आणि व्यवस्थापनाने सुटकेचा निःश्वास सोडला.

3 सामन्यांची रंगणार चुरस

भारत आणि वेस्ट इंडिज दरम्यान 27 सप्टेंबर ते 17 ऑक्टोबर या कालावधीत 3 एकदिवसीय आणि 5 टी-20 सामन्यांची मालिका खेळवली जाणार आहे. या दौऱ्याची सुरुवात एकदिवसीय मालिकेतील संघर्षाने होणार आहे. पहिला सामना 27 सप्टेंबर रोजी तिरुअनंतपुरम येथे, दुसरा सामना 30 सप्टेंबर रोजी गुवाहाटी येथे, तर तिसरा व अंतिम सामना 3 ऑक्टोबर रोजी न्यू चंदिगढ येथे दुपारी 2:00 वाजता खेळवला जाईल. शुभमन गिलच्या नेतृत्वाखालील भारतीय संघात रोहित शर्मा, विराट कोहली आणि रवींद्र जडेजासारख्या अनुभवी खेळाडूंचा समावेश असून नवोदित खेळाडूंनाही संधी देण्यात आली आहे.

हेही वाचा – मुंबई इंडियन्सची मोठी घोषणा! RCB ला चॅम्पियन बनवणाऱ्याकडे सोपवली मुख्य प्रशिक्षकपदाची धुरा

भारतीय संघाचा कसून सराव; कर्णधाराच्या तंदुरुस्तीकडे सर्वांचे लक्ष

मालिकेच्या पार्श्वभूमीवर भारतीय खेळाडू गेल्या दोन दिवसांपासून जोरदार सराव करत आहेत. गुरुवारी शुभमनने वेगवान माऱ्याविरुद्ध कसून फलंदाजी केली होती, तर विराट कोहली आणि ऋतुराज गायकवाड यांनी फिरकी गोलंदाजीचा सामना करत रणनीती आखली. मात्र, शुक्रवारी घडलेल्या या घटनेमुळे कर्णधाराच्या तंदुरुस्तीवर प्रश्नचिन्ह निर्माण झाले होते. वेस्ट इंडिजचा संघ शाय होपच्या नेतृत्वाखाली मैदानात उतरणार असून दोन्ही संघांमधील हा सामना अत्यंत रोमांचक होण्याची शक्यता आहे.