Ruturaj Gaikwad: भारतीय संघात पुनरागमनासाठी सज्ज असलेल्या ऋतुराज गायकवाडने आपल्या फलंदाजीतील सातत्य पुन्हा एकदा सिद्ध केले आहे. श्रीलंका 'ए' संघाविरुद्धच्या सामन्यात इंडिया 'ए' कडून खेळताना ऋतुराजने संयमी आणि क्लासिक फलंदाजीचे प्रदर्शन घडवले. परिस्थितीचे गांभीर्य ओळखून त्याने अवघ्या 9 चौकारांच्या मदतीने 112 चेंडूंमध्ये आपले दिमाखदार शतक पूर्ण केले. त्याची ही खेळी निव्वळ फटकेबाजीची नसून अत्यंत परिपक्व अशी होती. या खेळीदरम्यान त्याने तिलक वर्मासोबत (60 धावा) शतकी भागीदारी रचत भारतीय संघाला भक्कम स्थितीत पोहोचवले. त्रिकोणी मालिकेतील या पहिल्या सामन्यात सलामीवीर वैभव सूर्यवंशी अवघ्या 14 धावांवर बाद झाल्यानंतर ऋतुराजने प्रियांश आर्यच्या (32 धावा) साथीने डाव सावरला.
भारतीय क्रिकेटच्या दोन दिग्गजांच्या 'स्पेशल क्लब'मध्ये एन्ट्री
या शतकी खेळीसह ऋतुराज गायकवाडने 'लिस्ट-ए' क्रिकेटमध्ये एक ऐतिहासिक टप्पा गाठला आहे. आता त्याच्या नावावर लिस्ट-ए प्रकारात एकूण 21 शतके जमा झाली आहेत. या कामगिरीसह त्याने भारताचे माजी महान फलंदाज राहुल द्रविड आणि विद्यमान मुख्य प्रशिक्षक गौतम गंभीर यांच्या विक्रमाची बरोबरी केली आहे. द्रविड आणि गंभीर या दोघांनीही आपल्या लिस्ट-ए कारकिर्दीत प्रत्येकी 21 शतके झळकावली होती. गायकवाडने हा टप्पा ओलांडताच मैदानावरील आणि डगआऊटमधील सर्व सहकाऱ्यांनी उभे राहून टाळ्यांच्या गजरात त्याचे कौतुक केले.
लिस्ट-ए क्रिकेटमध्ये सचिन-विराट अव्वल स्थानावर
ऋतुराजने या दिग्गजांच्या क्लबमध्ये स्थान मिळवले असले, तरी भारतासाठी या प्रकारात सर्वाधिक शतके करणाऱ्यांच्या यादीत 'मास्टर ब्लास्टर' सचिन तेंडुलकर अजूनही अव्वल स्थानावर आहेत. भारतासाठी सर्वाधिक लिस्ट-ए शतके करणाऱ्या खेळाडूंची आकडेवारी खालीलप्रमाणे आहे: सध्याच्या घडीला भारताच्या मुख्य संघात स्थान मिळवण्यासाठी धडपडणाऱ्या ऋतुराजसाठी ही कामगिरी अत्यंत मोलाची ठरणार आहे. या कामगिरीमुळे त्याने निवड समितीचे लक्ष पुन्हा एकदा आपल्याकडे वेधून घेतले आहे.
'लिस्ट-ए' क्रिकेटमध्ये भारतासाठी सर्वाधिक शतके झळकावणाऱ्या दिग्गज फलंदाजांचा विचार केला, तर 'मास्टर ब्लास्टर' सचिन तेंडुलकर 60 शतकांसह या यादीत अव्वल स्थानावर आहेत. त्यांच्यापाठोपाठ विराट कोहली 59 शतकांसह दुसऱ्या क्रमांकावर असून, रोहित शर्मा 37 शतकांसह तिसऱ्या आणि सौरव गांगुली 31 शतकांसह चौथ्या स्थानावर विराजमान आहेत. या प्रतिष्ठित फलंदाजांनंतर राहुल द्रविड आणि गौतम गंभीर या दोघांनीही प्रत्येकी 21 शतके झळकावली असून, आता युवा फलंदाज ऋतुराज गायकवाडनेही आपल्या 21 व्या शतकासह या दिग्गजांच्या क्लबमध्ये मानाचे स्थान मिळवले आहे.
