IND vs SL: भारत आणि श्रीलंका यांच्यातील बहुप्रतिक्षीत कसोटी मालिका सुरू होण्यापूर्वीच श्रीलंकेच्या क्रीडा जगताला एका अत्यंत दुर्दैवी घटनेने मोठा धक्का बसला आहे. देशातील नामवंत क्रिकेट प्रशिक्षक सुमिथ फर्नांडो यांचे एका नवोदित खेळाडूसोबत झालेल्या वादात निधन झाले. कोलंबो येथील ब्लूमफिल्ड क्रिकेट क्लबच्या परिसरात ही धक्कादायक घटना घडली. सरावादरम्यान पिण्याच्या पाण्यासाठी नळाजवळ गेलेल्या खेळाडूंना पाणी उपलब्ध न झाल्यामुळे तिथे उपस्थित कर्मचाऱ्यांशी आणि फर्नांडो यांच्याशी बाचाबाची झाली. हा किरकोळ वाद पाहता पाहता विकोपाला गेला आणि त्याचे रूपांतर हाणामारीत झाले.
कुसल मेंडिसच्या माजी प्रशिक्षकाचा करुण अंत
सुमिथ फर्नांडो हे श्रीलंकेच्या क्रिकेट वर्तुळातील एक प्रतिष्ठित नाव होते. श्रीलंकेच्या एकदिवसीय क्रिकेट संघाचा कर्णधार कुसल मेंडिस याला त्याच्या कारकिर्दीच्या सुरुवातीच्या काळात फर्नांडो यांनीच मोलाचे मार्गदर्शन केले होते. प्रत्यक्षदर्शी आणि पोलिसांनी दिलेल्या माहितीनुसार, वादादरम्यान फर्नांडो यांनी राग अनावर न झाल्याने एका 17 वर्षांच्या खेळाडूवर कथितपणे वार करण्याचा प्रयत्न केला. यावर स्वतःचा बचाव करण्यासाठी त्या अल्पवयीन खेळाडूने दिलेल्या प्रत्युत्तरात फर्नांडो गंभीर जखमी झाले. त्यांना तातडीने जवळच्या वैद्यकीय केंद्रात दाखल करण्यात आले, परंतु उपचारादरम्यान डॉक्टरांनी त्यांना मृत घोषित केले. या घटनेनंतर गुरुवारी त्यांच्यावर अंतिम संस्कार करण्यात आले.
संशयित खेळाडूला अटक; पोलिसांकडून चौकशी सुरू
या प्रकरणी कारवाई करत पोलिसांनी सीडूवा येथील लियानागेमुल्ला परिसरात राहणाऱ्या 17 वर्षीय संशयित खेळाडूला तात्काळ ताब्यात घेतले. आरोपीला कोलंबो दंडाधिकारी न्यायालयात सादर केले असता, न्यायालयाने त्याला 11 ऑगस्ट रोजी हजर केल्यानंतर 17 ऑगस्टपर्यंत परिवीक्षा व बालसंगोपन विभागाच्या संरक्षणात ठेवण्याचे निर्देश दिले आहेत.
दरम्यान, या मृत्यूमागचे नेमके कारण शोधण्याचे काम प्रशासन करत आहे. फर्नांडो यांना आधीपासूनच हृदयाचा आजार होता, अशी माहिती समोर आली आहे. त्यामुळे त्यांचा मृत्यू थेट मारहाणीतील दुखापतींमुळे झाला की तीव्र वैद्यकीय समस्येमुळे, हे स्पष्ट करण्यासाठी वैद्यकीय अधिकाऱ्यांनी शवविच्छेदन केले असून त्याच्या अहवालाची प्रतीक्षा केली जात आहे.
