भारतीय महिला क्रिकेट संघाच्या कर्णधारपदी स्मृती मानधनाची नियुक्ती

नवी दिल्ली : गेल्या काही वर्षांत भारतीय महिला क्रिकेटमधील एक प्रमुख खेळाडू म्हणून स्मृती मानधना हिने आपली ओळख निर्माण केली असून, विविध प्रकारच्या (फॉर्मेट्स) क्रिकेटमध्ये संघाच्या प्रगतीत तिने महत्त्वाची भूमिका बजावली आहे. एक अनुभवी आंतरराष्ट्रीय क्रिकेटपटू असलेल्या स्मृतीने देशांतर्गत आणि फ्रँचायझी क्रिकेटमध्येही आपल्या नेतृत्वाचे गुण सिद्ध केले आहेत. विशेषतः तिने ‘रॉयल ​​चॅलेंजर्स बेंगळुरू’चे नेतृत्व करत 2024 आणि 2026 मध्ये ‘महिला प्रीमियर लीग’चे (WPL) विजेतेपद मिळवून दिले आहे. 2013 पासून भारतीय संघाचा भाग असलेल्या स्मृतीकडे या भूमिकेसाठी आवश्यक असलेला दांडगा अनुभव आहे. आता ती संघाचे नेतृत्व करण्याची जबाबदारी स्वीकारणार आहे. आतापासून ती ‘व्हाइट-बॉल’ क्रिकेटसाठी (एकदिवसीय आणि टी-20) पूर्णवेळ कर्णधार म्हणून काम पाहणार असली, तरी यापूर्वीही तिने 18 टी-20 आंतरराष्ट्रीय आणि 4 एकदिवसीय सामन्यांमध्ये भारताचे नेतृत्व केले आहे.

हेही वाचा : IPL 2027 पूर्वी दिल्ली कॅपिटल्सची मोठी घोषणा; सौरव गांगुली यांची मुख्य प्रशिक्षक म्हणून नियुक्ती

आपल्या नियुक्तीबद्दल बोलताना स्मृती मानधना म्हणाली की, “भारताचे नेतृत्व करण्याची जबाबदारी मिळणे हा एक अत्यंत विशेष सन्मान आहे. भारताचे प्रतिनिधित्व करणे माझ्यासाठी नेहमीच खूप महत्त्वाचे राहिले आहे आणि आता संघाचे नेतृत्व करण्याची संधी मिळणे ही माझ्यासाठी अत्यंत मोलाची गोष्ट आहे. बीसीसीआय (BCCI), निवड समिती, माझे सहकारी खेळाडू आणि माझ्या प्रवासात मला साथ देणाऱ्या तसेच माझ्यावर विश्वास टाकणाऱ्या प्रत्येकाची मी आभारी आहे. “हरमनप्रीत आणि तिने गेल्या काही वर्षांत कर्णधार म्हणून दिलेल्या योगदानाचीही मी दखल घेऊ इच्छिते. तिने अत्यंत निष्ठेने संघाचे नेतृत्व केले आहे आणि ती आमच्या प्रवासाचा एक महत्त्वाचा भाग राहिली आहे. “या भूमिकेसोबत येणारी जबाबदारी मला समजते. संघासोबत काम करण्यास, त्यातून शिकण्यास आणि भारतीय क्रिकेटला पुढे नेण्यासाठी माझे सर्वोत्तम योगदान देण्यास मी उत्सुक आहे.”

A dawn of a new era ✨ Smriti Mandhana takes charge as the Captain of the Indian Women’s cricket team 🇮🇳 Go well, Captain 🫡 More details ▶️ https://t.co/tbLb4jOiCn #TeamIndia | @mandhana_smriti https://t.co/27AxmrUhKt — BCCI (@BCCI) October 6, 2026

बीसीसीआयचे अध्यक्ष मिथुन मन्हास म्हणाले की, “भारतीय महिला क्रिकेट संघाचे नेतृत्व करण्याची जबाबदारी सोपवण्यात आल्याबद्दल मी स्मृतीचे अभिनंदन करतो. ती अनेक वर्षांपासून भारतीय क्रिकेटचा एक महत्त्वाचा भाग राहिली आहे आणि तिने सातत्याने पुढाकार घेऊन नेतृत्व करण्याचे गुण दाखवून दिले आहेत. ही जबाबदारी स्वीकारताना तिचा अनुभव आणि खेळाची समज अत्यंत मोलाची ठरेल.” “बीसीसीआयला स्मृतीवर पूर्ण विश्वास आहे आणि मला खात्री आहे की, आपल्या कारकिर्दीत तिने ज्याप्रमाणे निष्ठा आणि व्यावसायिकता जपली आहे, त्याच वृत्तीने ती या भूमिकेकडे पाहिल. बीसीसीआयच्या वतीने मी तिला खूप खूप शुभेच्छा देतो आणि तिच्या नेतृत्वाखाली संघ या नवीन पर्वात कशी कामगिरी करतो, हे पाहण्यास मी उत्सुक आहे.”