IND vs PAK Live Streaming: क्रिकेट विश्वातील सर्वात मोठी आणि रोमांचक स्पर्धा म्हणजेच महिला T20 विश्वचषक सुरू झाला आहे. 12 जून ते 5 जुलै 2026 या कालावधीत रंगणाऱ्या या स्पर्धेत विजेतेपद मिळवून इतिहास रचण्याचा भारतीय महिला संघाचा मानस आहे. या मोहिमेची सुरुवात टीम इंडिया एका हाय-व्होल्टेज सामन्याने करणार आहे. भारतीय संघ आपला पहिलाच सामना 14 जून रोजी कट्टर प्रतिस्पर्धी पाकिस्तानविरुद्ध खेळणार असून, या अटीतटीच्या लढतीसाठी जगभरातील क्रिकेट चाहते कमालीचे उत्सुक आहेत.
कधी आणि कुठे होणार सामना?
भारत आणि पाकिस्तान महिला संघांमधील हा अटीतटीचा सामना 14 जून रोजी बर्मिंगहॅम येथील ऐतिहासिक एजबॅस्टन स्टेडियमवर खेळवला जाईल. भारतीय प्रमाणवेळेनुसार (IST) हा सामना संध्याकाळी 7:00 वाजता सुरू होईल, तर सामन्याची नाणेफेक (टॉस) अर्धा तास आधी म्हणजेच संध्याकाळी 6:30 वाजता होईल. या विश्वचषकात भारतीय संघाचे कर्णधारपद हरमनप्रीत कौरकडे आहे, तर पाकिस्तान संघाचे नेतृत्व फातिमा सना करत आहे. पाकिस्तानला धूळ चारून स्पर्धेत विजयी सलामी देण्याचा भारतीय संघाचा पूर्ण प्रयत्न असेल.
टीव्ही आणि मोबाईलवर थेट प्रक्षेपण कुठे पाहायचे?
तुम्हाला या रोमांचक सामन्याचा आनंद घरबसल्या घ्यायचा असेल, तर टीव्हीवर स्टार स्पोर्ट्स 1, स्टार स्पोर्ट्स 1 HD, स्टार स्पोर्ट्स 2, स्टार स्पोर्ट्स 2 HD, स्टार स्पोर्ट्स 3 आणि स्टार स्पोर्ट्स 3 HD या चॅनेल्सवर सामन्याचे थेट लाइव्ह प्रक्षेपण पाहता येईल. याशिवाय, डिजिटल प्लॅटफॉर्मवर स्मार्टफोन किंवा मोबाईलवर सामना पाहण्यासाठी चाहत्यांना 'जिओ-हॉटस्टार' (JioHotstar) ॲपचा वापर करावा लागेल, जिथे सामन्याचे थेट डिजिटल स्ट्रीमिंग उपलब्ध असेल.
हेड-टू-हेड आकडेवारीत टीम इंडियाचे पारडे जड
महिला T20 विश्वचषकाचा इतिहास पाहिला तर भारतीय संघाचे स्थान अत्यंत मजबूत दिसते. 2009 मध्ये सुरू झालेल्या या स्पर्धेच्या आतापर्यंतच्या 9 आवृत्त्यांमध्ये भारत आणि पाकिस्तान यांच्यात एकूण 8 वेळा आमनेसामने लढत झाली आहे. या 8 सामन्यांपैकी 6 सामन्यांमध्ये भारताने दणदणीत विजय मिळवला आहे, तर पाकिस्तानला केवळ 2 सामन्यांत यश आले आहे. यापूर्वी 2024 च्या T20 विश्वचषकात झालेल्या लढतीतही भारतीय महिला संघाने पाकिस्तानचा 6 गडी राखून पराभव केला होता. त्यामुळे आकडेवारीनुसार या सामन्यातही भारतीय संघाचे पारडे जड मानले जात आहे.
