मोठी बातमी! 17 सदस्यीय संघातून वैभव सूर्यवंशीला वगळलं, नवीन मुख्य प्रशिक्षकाचीही घोषणा

भारताचा देशांतर्गत क्रिकेट हंगाम सुरु होत असून, येत्या 11 ऑक्टोबरपासून रणजी करंडक (2026-27) स्पर्धेचा बिगुल वाजणार आहे. या हंगामात ‘एलिट ग्रुप’मध्ये खेळणाऱ्या बिहार क्रिकेट असोसिएशनने आपल्या पहिल्या दोन सामन्यांसाठी 17 सदस्यीय संघाची अधिकृत घोषणा केली आहे. या संघातून 16 वर्षीय उदयोन्मुख फलंदाज वैभव सूर्यवंशी याला वगळण्यात आले असून, साकिबुल गनीकडे संघाचे कर्णधारपद सोपवण्यात आले आहे. तसेच बिहार क्रिकेट असोसिएशनने प्रशिक्षक मंडळात मोठा बदल करत माजी खेळाडू आशुतोष अमन यांची नवीन मुख्य प्रशिक्षक म्हणून नियुक्ती केली आहे.

न्यूझीलंड दौऱ्यातील व्यस्ततेमुळे वैभव सूर्यवंशीला विश्रांती

आंतरराष्ट्रीय स्तरावर चमक दाखवल्यानंतर वैभव सूर्यवंशी भारतीय टी-20 संघाचा नियमित घटक बनला आहे. ज्या कालावधीत बिहारचे पहिले दोन रणजी सामने खेळवले जाणार आहेत, त्याच काळात भारतीय संघ न्यूझीलंड दौऱ्यावर 5 सामन्यांची टी-20 मालिका खेळत आहे. या मालिकेत सूर्यवंशीचा भारतीय संघात समावेश असल्यामुळे वेळापत्रकातील या व्यस्ततेमुळेच त्याला बिहारच्या रणजी संघात स्थान देण्यात आलेले नाही.

साकिब हुसेनचा संघात समावेश आणि आयपीएलमधील कामगिरी

आयपीएलच्या 2026 च्या हंगामात सनरायझर्स हैदराबाद संघाचे प्रतिनिधित्व करणाऱ्या वेगवान गोलंदाज साकिब हुसेनची रणजी संघाच्या पहिल्या दोन सामन्यांसाठी निवड झाली आहे. साकिबने आयपीएलच्या 11 सामन्यांमध्ये 26.46 च्या उत्कृष्ट सरासरीने 15 बळी घेतले होते. त्याच्या समावेशामुळे बिहारच्या गोलंदाजीला अधिक धार येण्याची शक्यता आहे. याशिवाय हिमांशू सिंगकडे उपकर्णधारपदाची धुरा सोपवण्यात आली आहे.

बिहारचा पहिला सामना उत्तर प्रदेशविरुद्ध

बिहारचा ‘एलिट ग्रुप’मधील पहिला सामना 11 ऑक्टोबर रोजी राजगीर आंतरराष्ट्रीय क्रिकेट स्टेडियमवर उत्तर प्रदेशविरुद्ध रंगणार आहे. यानंतर त्यांचा दुसरा सामना बडोद्याच्या संघाविरुद्ध होईल. 2026-27 चा रणजी करंडक हंगाम 11 ऑक्टोबर 2026 ते 3 मार्च 2027 या कालावधीत खेळवला जाणार आहे. बलाढ्य संघांचा सामना करावा लागणार असल्याने बिहारसाठी हा हंगाम अत्यंत आव्हानात्मक मानला जात आहे.

हेही वाचा –  ‘5 कोटींचा दावा…’; प्रेमानंद महाराज आश्रम वादावर विराट कोहलीचं स्पष्टीकरण

बिहारचा 17 सदस्यीय संघ:

साकिबुल गनी (कर्णधार), हिमांशू सिंग (उपकर्णधार), आयुष लोहारुका, मंगल महरौर, नमन गौरव, पियुष सिंग, बिपिन कुमार सौरभ (यष्टिरक्षक), श्रमण निग्रोध (यष्टिरक्षक), आकाश राज, पृथ्वी राज, खालिद आलम, सूरज कुमार कश्यप, साकिब हुसेन, मोहम्मद इझहार, शब्बीर खान, राघवेंद्र सिंग, अमोद यादव.

राखीव खेळाडू: नवाझ खान, मलय राज, दानिश आलम, तरुण कुमार सिंग, सचिन कुमार सिंग, प्रशांत कुमार सिंग.