Amir Jangoo Century: गुवाहाटी येथे खेळल्या जात असलेल्या दुसऱ्या एकदिवसीय सामन्यात वेस्ट इंडिजच्या फलंदाजांनी भारतीय गोलंदाजीचा पार धुव्वा उडवला. कॅरेबियन संघातील 3 फलंदाजांनी शानदार शतके ठोकत चौकार आणि षटकारांची खैरात केली. यात डावखुरा फलंदाज आमिर जांगूने अवघ्या 70 चेंडूंत आपले धडाकेबाज शतक पूर्ण केले. भारताविरुद्ध शतक झळकवणारा तो वेस्ट इंडिजचा पहिला मुस्लिम खेळाडू ठरला आहे. त्याने 150 च्या स्ट्राइक रेटने 77 चेंडूंत 114 धावांची स्फोटक खेळी साकारली. त्याच्या या तडाखेबंद कामगिरीच्या जोरावर वेस्ट इंडिजने धावफलकावर 400 हून अधिक धावांचा डोंगर उभा करत भारताला विजयासाठी 406 धावांचे भव्य लक्ष्य दिले आहे.
कर्णधार शे होपसोबत भक्कम भागीदारी
आमिर जांगूने कर्णधार शे होपच्या साथीने तिसऱ्या गड्यासाठी 131 चेंडूंत 182 धावांची महत्त्वाची भागीदारी रचली. जांगूने 44 चेंडूंत अर्धशतक झळकावल्यानंतर पुढील 30 चेंडूंतच शतकाला गवसणी घातली. त्याने भारतीय गोलंदाज गुरनूर बराडच्या 21 चेंडूंत 41 धावा कुटल्या, तर कुलदीप यादवच्या 15 चेंडूंत 24 धावा वसूल केल्या. अखेर रवींद्र जाडेजाने त्याला बाद करत ही तुफानी खेळी रोखली. जांगूच्या या आक्रमक पवित्र्यामुळे भारतीय गोलंदाजांवर सुरुवातीपासूनच मोठा दबाव निर्माण झाला.
हेही वाचा – महिला खेळाडूंची सुवर्ण कामगिरी; भारताने आशियाई खेळात नेमबाजीत जागतिक विक्रमासह पटकावले सुवर्णपदक
ब्रायन लाराच्या कॉलेजमधून क्रिकेटचे धडे
आमिर जांगूने फातिमा कॉलेजमधून क्रिकेटचे धडे गिरवले आहेत. हे तेच महाविद्यालय आहे जिथून दिग्गज ब्रायन लारा घडले. वेस्ट इंडिजच्या देशांतर्गत क्रिकेटमध्ये सातत्याने खोऱ्याने धावा ओढणाऱ्या जांगूने 2024 मध्ये आंतरराष्ट्रीय वनडे पदार्पणात 79 चेंडूंत शतक ठोकले होते. चालू 2026 या वर्षात त्रिनिदादला प्रथम श्रेणी स्पर्धेत विजेतेपद मिळवून देताना त्याने जून महिन्यात द्विशतक झळकावले होते. कॅरेबियन प्रीमियर लीगच्या अंतिम सामन्यातही त्याने अर्धशतकी योगदान दिले होते.
