डेमोक्रॅटिक रिपब्लिक ऑफ काँगोमधील काँगो नदीवर रविवारी दोन मोटारयुक्त लाकडी बोटींची समोरासमोर भीषण धडक होऊन किमान 30 जणांचा दुर्दैवी मृत्यू झाला, तर अनेक प्रवासी बेपत्ता झाले आहेत. स्थानिक प्रशासकीय अधिकाऱ्यांनी सोमवारी या घटनेला अधिकृत दुजोरा दिला. गेल्या महिन्यातच काँगोमधील बुकावू शहरातील दोन शाळांना लागलेल्या भीषण आगीत 26 विद्यार्थ्यांचा मृत्यू झाला होता. त्यामध्ये 19 मुली आणि 7 मुलांचा समावेश होता. ही शोकांतिका ताजी असतानाच हा मोठा बोट अपघात घडला आहे.
शोधमोहीम सुरू; मृतांचा आकडा वाढण्याची भीती
‘इक्वाटर’ (Equateur) प्रांताचे गृहमंत्री क्रिस्पिन मापुटू यांनी दिलेल्या माहितीनुसार, हा अपघात ‘न्गोम्बे-लुकोलेला’ (Ngombe-Lukolela) परिसराजवळ झाला. अपघातात प्राण गमावलेल्या 30 जणांवर आधीच अंत्यसंस्कार करण्यात आले आहेत. सध्या बेपत्ता प्रवाशांचा आणि जिवंत वाचलेल्यांचा शोध घेण्यासाठी काँगो नदीमध्ये मदत व बचाव पथकांकडून व्यापक शोधमोहीम राबवली जात आहे. अनेक प्रवासी अजूनही बेपत्ता असल्याने मृतांचा आकडा अधिक वाढण्याची भीती प्रशासनाकडून व्यक्त केली जात आहे.
ओव्हरलोडिंग आणि समोरासमोर धडक
अधिकाऱ्यांनी दिलेल्या माहितीनुसार, एक बोट वायव्येकडील ‘उबांगी’ भागातून राजधानी ‘किनशासा’ कडे जात होती, तर दुसरी बोट किनशासाहून ‘लुकोलेला’कडे येत होती. लुकोलेलाजवळ पोहोचण्यापूर्वीच दोन्ही बोटींची जोरदार धडक झाली. प्रत्यक्षदर्शी सुरक्षा कर्मचाऱ्याने ‘एपी’ (AP) वृत्तसंस्थेला सांगितले की, उबांगीहून येणाऱ्या बोटीवर क्षमतेपेक्षा जास्त माल भरलेला होता. धडक झाल्यानंतर बोट पूर्णपणे नदीत बुडाली, ज्यामुळे बहुतांश प्रवासी पाण्यात अडकले.
हेही वाचा – कोरोनानंतर जगात पुन्हा नव्या संसर्गाची भीती?; रशियातील लॅबमध्ये ‘त्या’ एका चुकीने महिला कर्मचाऱ्याचा मृत्यू
कमकुवत पायाभूत सुविधा अन् सुरक्षेचा अभाव
डेमोक्रॅटिक रिपब्लिक ऑफ काँगोमध्ये अशा प्रकारचे प्राणघातक बोट अपघात वारंवार घडताना दिसतात. रात्रीच्या वेळी होणारी बेकायदेशीर वाहतूक आणि ओव्हरलोडिंग (क्षमतेपेक्षा जास्त प्रवासी व माल वाहून नेणे) ही अपघातांची मुख्य कारणे मानली जातात. तसेच दुर्गम भागांमध्ये सुरक्षिततेच्या नियमांचे पालन न होणे आणि कमकुवत पायाभूत सुविधांमुळे दरवर्षी शेकडो प्रवाशांना आपला जीव गमवावा लागत आहे.
