LAX विमानतळावर डेल्टा आणि एअर कॅनडाच्या विमानांची धडक; नेमकं कारण काय? FAA चा तपास सुरू

लॉस एंजेलिस आंतरराष्ट्रीय विमानतळावर मंगळवार, 6 ऑक्टोबर रोजी (LAX) जमिनीवरून जात असताना डेल्टा एअर लाइन्सचे विमान आणि एअर कॅनडाच्या विमानाची टक्कर झाली, असे अधिकाऱ्यांनी सांगितले. ही घटना स्थानिक वेळेनुसार सकाळी सुमारे 10.30 वाजता टॅक्सीवेवर घडली. डेल्टाचे विमान टोकियोला जाण्याच्या तयारीत असताना ही घटना घडली. LAX येथे डेल्टा आणि एअर कॅनडाच्या विमानांची टक्कर झाली. केंद्रीय अधिकारी या घटनेची चौकशी करत आहेत.  फेडरल एव्हिएशन ॲडमिनिस्ट्रेशनने (FAA) सांगितले की, डेल्टा विमानाच्या डाव्या पंखाचे टोक एअर कॅनडाच्या विमानाच्या शेपटीवरील हॉरिझॉन्टल स्टेबिलायझरला घासले. एअर कॅनडाचे विमान टोरोंटोहून आले होते. त्याला त्याच्या गेटकडे ओढले जात असताना ही टक्कर झाली. LAX येथील विमानसेवा सामान्यपणे सुरू राहिली. दोन्ही विमाने तपासणीसाठी सेवेतून बाहेर काढण्यात आली. या धडकेचे कारण काय होते, याची एफएए (FAA) चौकशी करत आहे.

या अपघातात सामील असलेले डेल्टाचे विमान फ्लाइट 7 होते. जे एक एअरबस ए350 (Airbus A350) असून ते टोकियोच्या उड्डाणासाठी टॅक्सींग करत होते. एअर कॅनडाचे विमान फ्लाइट एसी785 (Flight AC785) होते. ज्याने नुकताच टोरोंटोहून आपला प्रवास पूर्ण केला होता. एफएएच्या (FAA) म्हणण्यानुसार, डेल्टा विमानाच्या डाव्या पंखाचे टोक एअर कॅनडा विमानाच्या हॉरिझॉन्टल स्टेबिलायझरला धडकले. घटनास्थळावरील छायाचित्रांमध्ये डेल्टाच्या पंखाचे टोक खराब होऊन एअर कॅनडा विमानाच्या शेपटीत अडकलेले दिसत होते. डेल्टाने सांगितले की, विमानात 275 प्रवासी आणि 15 कर्मचारी होते. विमान कंपनीने म्हटले की “आमचे ग्राहक आणि कर्मचारी यांच्या सुरक्षिततेपेक्षा अधिक महत्त्वाचे काहीही नाही. प्रवासादरम्यान आलेल्या अनुभवाबद्दल आणि झालेल्या विलंबाबद्दल आम्ही आमच्या ग्राहकांची माफी मागतो. ” एअर कॅनडाने सांगितले की, त्यांचे विमान तपासणी आणि दुरुस्तीसाठी सेवेतून बाजूला केले जाईल.

हेही वाचा : “…तर आंदोलनं का होणार नाहीत?” देवेंद्र फडणवीस बैठकीत अधिकाऱ्यांवर संतापले; नेमकं कारण काय?

विमानतळ अधिकाऱ्यांच्या माहितीनुसार, ही धडक धावपट्टीवर (runway) नव्हे, तर टॅक्सीवेवर झाली. लॉस एंजेलिस वर्ल्ड एअरपोर्ट्स (जे LAX विमानतळाचे कामकाज पाहते) यांनी सांगितले की, या घटनेनंतरही विमानसेवा नेहमीप्रमाणे सुरू राहिली. एफएए (FAA) ने या धडकेबाबत चौकशी सुरू केली आहे. नॅशनल ट्रान्सपोर्टेशन सेफ्टी बोर्डालाही (NTSB) या घटनेची माहिती देण्यात आली आहे. डेल्टाने सांगितले की, या घटनेनंतर त्यांची देखभाल करणारी पथके आणि विमानतळ कर्मचारी विमानाची तपासणी करत असून अधिकाऱ्यांच्या संपर्कात राहून काम करत आहेत. एअर कॅनडानेही दुजोरा दिला की, तपासणी आणि दुरुस्तीचे काम सुरू असेपर्यंत त्यांचे विमान सेवेतून बाहेर ठेवले जाईल. एफएए (FAA) कडून मिळालेली माहिती प्राथमिक स्वरूपाची आहे.