विद्यार्थी आंदोलनाला हिंसक वळण, 25,0000 विद्यार्थी रस्त्यावर; पोलिसांकडून अश्रूधुराचा मारा

Student Protest: शिक्षणातील गंभीर त्रुटी, अपुऱ्या सुविधा आणि वर्गखोल्यांमधील अतिगर्दीच्या विरोधात फ्रान्समधील विद्यार्थी आक्रमक झाले आहेत. सप्टेंबरच्या उत्तरार्धापासून सुरू झालेल्या या शालेय आंदोलनांनी आता संपूर्ण देशात तीव्र रूप धारण केले असून, या संघर्षाला राजकीय वळणही लागले आहे. प्रशासनाने परिस्थितीचे गांभीर्य ओळखून देशभरातील हायस्कूलचे वर्ग या आठवड्यासाठी पूर्णपणे बंद ठेवण्याचा निर्णय घेतला आहे. मंगळवारी शिक्षण व्यवस्थेत सुधारणांच्या मागणीसाठी सुमारे 2,50,000 ते 5,00,000 विद्यार्थ्यांनी रस्त्यावर उतरून भव्य रॅली काढल्या. सुमारे 2,000 हायस्कूल्सची प्रवेशद्वारे आंदोलकांनी अडवून धरली होती.

विद्यार्थ्यांच्या मुख्य मागण्या आणि आंदोलनाचे कारण

विद्यार्थ्यांची सर्वात मोठी तक्रार ही अनुपस्थित शिक्षकांबाबत आहे. शिक्षक रजेवर असताना पर्यायी शिक्षकांची व्यवस्था न केल्याने अनेक तास रद्द होतात. याशिवाय खच्चून भरलेल्या वर्गखोल्या, जर्जर इमारती, गळकी छत आणि उंदरांचा उपद्रव अशा विदारक स्थितीत अभ्यास करावा लागत असल्याचे विद्यार्थ्यांचे म्हणणे आहे. सकाळी 8 ते सायंकाळी 6 वाजेपर्यंत चालणाऱ्या दीर्घ शालेय वेळापत्रकात बदल करावा आणि दुपारच्या जेवणासाठी मोठा ब्रेक मिळावा, अशी मागणी विद्यार्थी करत आहेत. या वाढत्या दबावामुळे शिक्षणमंत्र्यांनी नवीन शिक्षकांची भरती करण्यासाठी विशेष उपक्रम सुरू करण्याची घोषणा केली आहे.

हिंसाचार, जाळपोळ आणि पोलिसांचा अश्रूधूर

स्ट्रासबर्ग, ल्योन आणि रेनेस या शहरांमध्ये आंदोलनाला अत्यंत हिंसक वळण लागले. आंदोलकांनी रस्त्यावर जाळपोळ करत विविध वस्तूंची फेकाफेक केली, तर त्यांना पांगवण्यासाठी पोलिसांनी अश्रूधुराच्या नळकांड्या फोडल्या. उत्तरेकडील लेन्स (Lens) शहरात हायस्कूल विद्यार्थी आणि पोलिसांमध्ये झालेल्या चकमकीदरम्यान एका 15 वर्षीय मुलाचा हात गंभीर जखमी होऊन कापला गेला. पोलिसांनी फेकलेले ग्रेनेड उचलण्याचा प्रयत्न करताना हा भीषण अपघात घडल्याचे सांगण्यात येत आहे.

हेही वाचा – LAX विमानतळावर डेल्टा आणि एअर कॅनडाच्या विमानांची धडक; नेमकं कारण काय? FAA चा तपास सुरू

फ्रान्स सरकारसमोर मोठे राजकीय संकट

विद्यार्थ्यांचा हा वाढता संताप रोखण्यासाठी फ्रान्स सरकार पूर्णपणे पेचात सापडले आहे. पंतप्रधान सेबॅस्टियन लेकोर्नू यांनी आपल्या मंत्र्यांना सकाळी 8 ते सायंकाळी 6 या शालेय वेळापत्रकाचा तात्काळ आढावा घेण्याचे निर्देश दिले आहेत. मात्र, साध्या दुरुस्तीविना पडून असलेल्या शाळा आणि कर्मचाऱ्यांची मोठी कमतरता यामुळे शिक्षण व्यवस्थेतील हा असंतोष सहजासहजी शमण्याची चिन्हे दिसत नाहीत.