अमेरिका-इराण युद्धविरामाच्या घोषणेनंतर जागतिक बाजारात मोठी उलथापालथ पाहायला मिळत आहे. डोनाल्ड ट्रम्प यांनी दोन आठवड्यांच्या युद्धविरामाची घोषणा करताच गुंतवणूकदारांनी सुरक्षित पर्यायाकडे धाव घेतली आणि सोन्याच्या किमतींमध्ये जोरदार तेजी नोंदवली गेली. बुधवारी 8 एप्रिल 2026 रोजी सुरुवातीच्या व्यवहारात स्पॉट गोल्ड तब्बल 2.3 टक्क्यांनी वाढून 4,811.66 डॉलर प्रति औंस या पातळीवर पोहोचले.
याआधी काल सोन्याच्या किमतींमध्ये 1.2 टक्क्यांची वाढ झाली होती, मात्र ट्रम्प यांनी ट्रुथ सोशलवर केलेल्या पोस्टनंतर बाजारात अधिकच उत्साह निर्माण झाला. अमेरिकेकडून पुढील दोन आठवड्यांपर्यंत इराणवर हल्ला होणार नाही, तसेच इराणकडून चर्चेसाठी 10 मुद्द्यांचा प्रस्ताव मिळाल्याची माहिती समोर आल्यानंतर गुंतवणूकदारांनी सोन्यातील गुंतवणूक वाढवली.
तज्ज्ञांच्या मते, सोन्याचा पुढील टप्पा 4,930 डॉलर प्रति औंस असा असू शकतो. सध्याची तेजी कायम राहिल्यास लवकरच सोने 5,000 डॉलर या ऐतिहासिक पातळीला गाठण्याची शक्यता व्यक्त केली जात आहे. जागतिक अस्थिरतेच्या पार्श्वभूमीवर सोन्याची मागणी आणखी वाढू शकते, असेही विश्लेषकांचे मत आहे.
हेही वाचा: Electricity Cut: 'या' शहरात मेट्रोच्या चुकीमुळे 24 तास बत्ती गुल; 'वर्क फ्रॉम होम' ठप्प, आयटीयन्स हैराण
दरम्यान, युद्धाच्या सुरुवातीपासून सोन्याच्या किमतींमध्ये उलट घट झाली होती. 28 फेब्रुवारी 2026 पासून सुरू झालेल्या संघर्षानंतर सोन्यात सुमारे आठ टक्क्यांपर्यंत घसरण झाली होती. मात्र युद्धविराम आणि ऊर्जा संकटामुळे निर्माण झालेल्या अनिश्चिततेमुळे पुन्हा एकदा सोने सुरक्षित गुंतवणुकीचा पर्याय म्हणून पुढे आले आहे.
इतर मौल्यवान धातूंमध्येही तेजी दिसून आली. प्लॅटिनम 2.4 टक्क्यांनी वाढून 2,004.95 डॉलरवर पोहोचले, तर पॅलेडियममध्ये 2.1 टक्क्यांची वाढ होऊन ते 1,500 डॉलरच्या आसपास व्यवहार करत आहे.
याचवेळी कच्च्या तेलाच्या किमतींमध्ये मोठी घसरण झाली आहे. युद्धविरामाच्या घोषणेनंतर काही तासांतच कच्चे तेल 117.63 डॉलरवरून घसरून 91.05 डॉलर प्रति बॅरलपर्यंत खाली आले. सुमारे 20 टक्क्यांची ही घसरण कोरोनानंतरची सर्वात मोठी मानली जात आहे. तज्ज्ञांच्या मते, युद्धामुळे वाढलेला अतिरिक्त दबाव कमी झाल्याने तेलाच्या किमतीत ही घसरण झाली आहे.
एकूणच, युद्धविरामामुळे जागतिक बाजारात सोन्याला बळ मिळाले असले, तरी तेलाच्या किमतींमध्ये मोठी पडझड झाली आहे. आगामी काळात आंतरराष्ट्रीय घडामोडींवरच या दोन्ही बाजारांची दिशा अवलंबून राहणार आहे.
हेही वाचा: Crude Oil Price Crash: युद्ध थांबताच क्रूड ऑईलच्या किमती कोसळल्या; कच्च्या तेलाच्या किमतीत 15 डॉलरची मोठी घसरण