Fuel shortage Lockdown in Pakistan: मध्य पूर्वेतील तीव्र युद्ध आणि वाढत्या राजकीय तणावामुळे आंतरराष्ट्रीय बाजारात कच्च्या तेलाचा पुरवठा खंडित झाला आहे. या इंधन संकटामुळे पाकिस्तानची आधीच डबघाईला आलेली अर्थव्यवस्था पूर्णपणे कोलमडली असून, परकीय चलनाचा साठा कमालीचा घटला आहे. या गंभीर परिस्थितीवर नियंत्रण मिळवण्यासाठी आणि देशांतर्गत इंधनाची बचत करण्यासाठी पाकिस्तान सरकारने थेट कोरोना काळातील लॉकडाऊनसारखे कडक निर्बंध संपूर्ण देशात लागू केले आहेत. या संदर्भातील अधिकृत अधिसूचना मंत्रिमंडळ सचिवालयाकडून जारी करण्यात आली आहे.
बाजारपेठा आणि हॉटेल्सच्या वेळांवर कडक मर्यादा
ऊर्जेची बचत करणे आणि रात्रीचा विजेचा वापर कमी करणे या उद्देशाने व्यापाऱ्यांवर आणि सार्वजनिक ठिकाणांवर कठोर वेळेचे बंधन घालण्यात आले आहे:
– दुकाने आणि मॉल: सर्व शॉपिंग मॉल, बाजारपेठा आणि किराणा दुकाने रात्री 9 वाजेपर्यंतच उघडी ठेवता येतील.
– लग्नाचे हॉल: विवाह सोहळ्यांसाठी असणारी मंगल कार्यालये आणि हॉल रात्री 10 वाजेपर्यंत बंद करणे बंधनकारक आहे.
– रेस्टॉरंट्स आणि कॅफे: हॉटेल्स आणि खानावळींना रात्री 11 वाजेपर्यंत परवानगी असेल (होम-डिलीवरी सेवांना यातून सूट दिली आहे).
– अत्यावश्यक सेवा: औषधांची दुकाने, रुग्णालये, पेट्रोल-सीएनजी पंप आणि आयटी क्षेत्राला या निर्बंधांमधून वगळण्यात आले आहे.
सरकारी उधळपट्टीला चाप; गाड्यांच्या खरेदीवर बंदी आणि 50 टक्के इंधन कपात
सरकारी खर्चात कपात करण्यासाठी प्रशासनाने स्वतःच्याच विभागांवर मोठे निर्बंध लादले आहेत. सर्व प्रकारच्या नवीन सरकारी वाहनांच्या खरेदीवर पूर्णपणे बंदी घालण्यात आली आहे. तसेच सरकारी अधिकाऱ्यांना मिळणाऱ्या इंधनाच्या कोट्यात थेट 50 टक्क्यांची कपात करण्यात आली आहे. याशिवाय सशस्त्र दलांची आणीबाणीच्या कामातील वाहने वगळता इतर सर्व विभागांसाठी वस्तूंच्या खरेदीवर बंदी लागू केली आहे. व्हीआयपी संस्कृती संपवण्यासाठी मंत्री आणि उच्च अधिकाऱ्यांच्या परदेश दौऱ्यांवर 3 महिन्यांसाठी बंदी घालण्यात आली असून, अपरिहार्य प्रवासासाठी केवळ 'इकॉनॉमी क्लास' वापरण्याचे आदेश देण्यात आले आहेत.
हेही वाचा – Oscar 2027: मराठी सिनेसृष्टीचा डंका जगभरात! ‘गोंधळ’ चित्रपटाची ऑस्कर 2027 साठी भारताकडून अधिकृत निवड
लग्नसमारंभासाठी 'वन-डिश' नियम आणि सरकारी मेजवान्यांवर बंदी
सामान्यांसाठी लागू करण्यात आलेल्या नियमांमध्ये अन्नधान्याची नासाडी टाळण्यासाठी लग्नसमारंभात 'सिंगल डिश' नियम लागू करण्यात आला आहे. आता कोणत्याही विवाह सोहळ्यात पाहुण्यांना केवळ एकच पदार्थ किंवा एकच मेनू वाढता येणार असल्याचे 'डॉन' वृत्तपत्राने स्पष्ट केले आहे. याशिवाय कोणत्याही सरकारी कार्यक्रमांचे आयोजन महागड्या खाजगी हॉटेल्समध्ये न करता केवळ सरकारी सभागृहातच करावे लागेल, तसेच परदेशी पाहुण्यांचा अपवाद वगळता इतर सर्व अधिकृत रात्रीच्या जेवणांवर (Official Dinners) पूर्ण बंदी घालण्यात आली आहे.
ऑनलाईन बैठकांवर भर आणि इंधन आयातीवरील ताण कमी करण्याचा प्रयत्न
शहराबाहेरील बैठकांसाठी प्रवास टाळून सरकारी विभागांना दूरध्वनीद्वारे किंवा व्हर्च्युअल कॉन्फरन्सद्वारे कामकाज चालवण्याचे निर्देश देण्यात आले आहेत. पाकिस्तानची ही कठोर काटकसर आणि प्रशासकीय निर्बंध देशातील उर्वरित इंधनाचा साठा टिकवून ठेवण्यासाठी अत्यंत महत्त्वाचे मानले जात आहेत. जागतिक पातळीवर इंधनाचे दर कमी होईपर्यंत आणि पुरवठा सुरळीत होईपर्यंत हे नियम कडकपणे लागू राहतील, असा इशारा सरकारने दिला आहे.
हेही वाचा – Gold Mine Collapse: सोन्याची खाण खचून 60 कामगारांचा करुण अंत; अनेकजण ढिगाऱ्याखाली अडकले
