अमेरिकेवर महामारीचे संकट? H5N1 विषाणूच्या रुग्णांमध्ये वाढ

वॉशिंग्टन: अमेरिकेत H5N1 विषाणूच्या प्रसारामुळे चिंता वाढली आहे. H5N1 हा एक प्रकारचा एव्हीयन इन्फ्लूएंझा विषाणू आहे, जो सामान्यतः बर्ड फ्लू म्हणून देखील ओळखला जातो. हा विषाणू प्रामुख्याने पक्ष्यांना प्रभावित करतो. परंतु काही प्रकरणांमध्ये तो मानवांना आणि इतर प्राण्यांना देखील संक्रमित करू शकतो. ग्लोबल व्हायरस नेटवर्कने जगभरातील सरकारांना H5N1 च्या उद्रेकासाठी कारवाई करण्याचे आणि तयारी करण्याचे आवाहन केले आहे. 

H5N1 मुळे साथीचा रोग होण्याची शक्यता  - 

संघटनेने LANCET अहवालात म्हटले आहे की, 'अमेरिकेतील दुग्धजन्य गायी आणि मानवांमध्ये H5N1 एव्हीयन इन्फ्लूएंझा विषाणूच्या संसर्गाचा प्रसार झाल्यामुळे साथीचा रोग होण्याची शक्यता वाढली आहे. 995 हून अधिक दुग्धजन्य गायींचे कळप आणि किमान 70 मानव प्रभावित झाले आहेत.'  

H5N1 विषाणू कसा पसरतो? 

H5N1 विषाणू संक्रमित पक्ष्यांच्या विष्ठा, लाळ किंवा पंखांच्या संपर्कातून वेगाने पसरतो. संक्रमित मांस खाल्ल्याने देखील हा विषाणू पसरतो. अहवालांनुसार, हा विषाणू आता गुरांमध्ये देखील आढळत आहे. तसेच काही प्रकरणांमध्ये तो मानवांमध्ये पसरले आहे. H5N1 विषाणूला एव्हीयन इन्फ्लूएंझा किंवा बर्ड फ्लू असेही म्हणतात.

प्रथम चीनमध्ये आढळला H5N1 विषाणू  - 

दरम्यान, H5N1 विषाणू 1996 मध्ये चीनमध्ये हंसांमध्ये पहिल्यांदा आढळून आला, तेव्हा H5N1 विषाणू कोंबड्यांमध्ये पसरला. कोंबड्यांनंतर हा विषाणू मानवांमध्येही पसरला. मानवी प्रकरणांमध्ये त्याचा उच्च मृत्युदर हा एक गंभीर चिंतेचा विषय आहे. 

हेही वाचा -  महाराष्ट्रातील ''या'' गावात 6,831 कोंबड्यांचा गूढ मृत्यू; संपूर्ण परिसरात हाय अलर्ट जारी

H5N1 विषाणूची लक्षणे - 

यावर्षी अमेरिकेच्या अनेक राज्यांमध्ये, विशेषतः दुग्धजन्य गायी आणि काही पोल्ट्री फार्ममध्ये H5N1 विषाणूची प्रकरणे आढळून आली आहेत. शास्त्रज्ञ आणि आरोग्य संस्था अमेरिकेत त्याच्या प्रसारावर बारकाईने लक्ष ठेवून आहेत. H5N1 विषाणूची लागण झालेल्या व्यक्तीमध्ये उच्च ताप, खोकला, घसा खवखवणे, श्वास घेण्यास त्रास होणे, शरीरदुखी आणि कधीकधी न्यूमोनिया अशी लक्षणे दिसू शकतात.

हेही वाचा -  Bird Flu Scare: महाराष्ट्रात माणसाला बर्ड फ्लूची लागण? धोका वाढला!

H5N1 विषाणूची लागण टाळण्याचा मार्ग म्हणजे संक्रमित पक्षी किंवा प्राण्यांपासून दूर राहणे. अंडी आणि मांस पूर्णपणे शिजवल्यानंतरच खा. जर तुम्हाला काही असामान्य लक्षणे दिसली तर ताबडतोब डॉक्टरांशी संपर्क साधा. सरकार आणि आरोग्य संस्थांनी दिलेल्या मार्गदर्शक सूचनांचे पालन करा.