La Trobe University Honorary Doctorate to Rani Mukerji emotional at IFFM: भारतीय चित्रपटसृष्टीतील प्रसिद्ध अभिनेत्री राणी मुखर्जीच्या शिरपेचात आणखी एक मानाचा तुरा रोवला गेला आहे. ऑस्ट्रेलियातील मेलबर्न येथे आयोजित ‘इंडियन फिल्म फेस्टिव्हल ऑफ मेलबर्न’ (IFFM 2026) दरम्यान ‘ला ट्रोब युनिव्हर्सिटी’ने (La Trobe University) तिला मानद ‘डॉक्टर ऑफ लेटर्स’ (D.Litt.) पदवीने सन्मानित केले. हा सर्वोच्च सन्मान स्वीकारताना व्यासपीठावर राणी अत्यंत भावूक झालेली पाहायला मिळाली. गेल्या सुमारे 30 वर्षांच्या कारकिर्दीचा सन्मान होत असताना तिचे डोळे आनंदाश्रूंनी भरून आले.
बालपणीचे स्वप्न अन् भावनांचा बांध फुटला
सन्मान स्वीकारल्यानंतर उपस्थितांशी संवाद साधताना राणी अत्यंत संवेदनशील झाली. ती म्हणाली, ‘लहान असताना इतर मुलांप्रमाणेच मलाही माझ्या आई-वडिलांना आणि माझ्या देशाला अभिमान वाटेल असे काहीतरी करायचे होते. हे कसे साध्य करायचे हे मला माहीत नव्हते, पण मी प्रामाणिकपणे प्रयत्न केले तर माझे आई-वडील नक्कीच आनंदी होतील याची मला खात्री होती. सिनेमा हे माझे हे स्वप्न पूर्ण करण्याचे माध्यम बनले. आज हा आंतरराष्ट्रीय सन्मान स्वीकारताना मला अत्यंत नम्र आणि भावूक वाटत आहे.’
‘शाहरुख खान’नंतर सन्मान मिळवणारी दुसरी भारतीय कलाकार
ला ट्रोब युनिव्हर्सिटीकडून अशा प्रकारची मानद डॉक्टरेट मिळवणारी राणी मुखर्जी ही शाहरुख खाननंतरची (2019) दुसरीच भारतीय चित्रपट जगतातील व्यक्ती ठरली आहे. चित्रपटसृष्टीतील अतुलनीय योगदानासोबतच तिने महिला सक्षमीकरण, शिक्षण आणि लहान मुलांच्या आरोग्यासाठी केलेल्या सामाजिक कार्याची दखल घेऊन युनिव्हर्सिटीने हा गौरव केला आहे. ‘कुछ कुछ होता है’पासून सुरू झालेला प्रवास ‘ब्लॅक’, ‘हिचकी’, ‘मर्दानी’ आणि ‘मिसेस चॅटर्जी व्हर्सेस नॉर्वे’सारख्या चित्रपटांपर्यंत पोहोचला, ज्याद्वारे तिने नेहमीच समाजाला प्रेरणा देणाऱ्या भूमिका साकारल्या.
‘हा सन्मान फक्त माझा नसून संपूर्ण भारताचा!’
आपल्या भावना व्यक्त करताना राणीने हा पुरस्कार संपूर्ण देशवासीयांना समर्पित केला. ‘मी हा सन्मान केवळ राणी मुखर्जी म्हणून नाही, तर एक भारतीय म्हणून स्वीकारत आहे. माझ्या देशाची संस्कृती आणि सिनेमा आज ऑस्ट्रेलियाच्या भूमीत साजरा होतोय, याचा मला अभिमान आहे. जर माझ्या चित्रपटांनी एका जरी व्यक्तीला भारत आणि येथील महिलांना अधिक चांगल्या प्रकारे समजून घेण्यास मदत केली असेल, तर अभिनेत्री म्हणून माझी जबाबदारी पूर्ण झाली असे मी मानते,’ असे सांगताना तिचा आवाज भरून आला होता.
कुलगुरूंकडून कौतुक; सामाजिक न्यायासाठी चित्रपट हेच माध्यम
ला ट्रोब युनिव्हर्सिटीचे कुलगुरू द ऑनरेबल जॉन ब्रम्बी (AO) यांनी राणीच्या कार्याचे भरभरून कौतुक केले. ते म्हणाले की, ‘राणी मुखर्जीचे काम केवळ मनोरंजनापुरते मर्यादित राहिलेले नाही. तिने आपल्या चित्रपटांमधून सामाजिक न्याय, समानता आणि समावेशकतेवर महत्त्वाची चर्चा घडवून आणली आहे. तिची सामाजिक बांधिलकी कौतुकास्पद असून तिला ही डॉक्टरेट बहाल करताना आम्हाला अत्यंत आनंद होत आहे.’
