वॉशिंग्टन: मध्य पूर्वेत सुरू असलेल्या संघर्षाच्या पार्श्वभूमीवर इराणच्या विशाल साउथ पार्स गॅस क्षेत्रावर झालेल्या हल्ल्यांमुळे तणाव आणखी वाढला आहे. या प्रकरणावर जगभरातून प्रतिक्रिया उमटत असताना अमेरिकेचे राष्ट्राध्यक्ष डोनाल्ड ट्रम्प यांनी या हल्ल्याशी अमेरिकेचा थेट संबंध नसल्याचे स्पष्ट केले आहे. ट्रम्प यांनी या कारवाईसाठी इस्रायलला जबाबदार ठरवत साउथ पार्स गॅस क्षेत्रावर पुढील हल्ले होणार नाहीत, असा दावा केला आहे.
डोनाल्ड ट्रम्प यांनी त्यांच्या सोशल मीडिया प्लॅटफॉर्मवर प्रतिक्रिया देताना सांगितले की इराणमधील साउथ पार्स गॅस क्षेत्रावर इस्रायलने केलेल्या हल्ल्याची अमेरिकेला कोणतीही पूर्वकल्पना नव्हती. तसेच या घटनेत कतारचा कोणताही सहभाग नसल्याचेही त्यांनी स्पष्ट केले. ट्रम्प यांच्या मते या हल्ल्यात गॅस क्षेत्राचा तुलनेने छोटा भाग प्रभावित झाला आहे.
मात्र डोनाल्ड ट्रम्प यांनी इराणला कठोर इशाराही दिला आहे. जर इराणने प्रत्युत्तर म्हणून कतारमधील ऊर्जा प्रकल्पांवर पुन्हा हल्ला केला, तर अमेरिका कठोर लष्करी कारवाई करेल, असे त्यांनी स्पष्ट केले. कतारमधील एलएनजी प्रकल्पांवर पुन्हा हल्ला झाल्यास अमेरिका कोणतीही तडजोड करणार नाही, असेही ट्रम्प यांनी म्हटले आहे.
हेही वाचा: Weather Update : वादळी वारा, विजांच्या कडकडाटांसह राज्यावर अवकाळीचं संकट; शेतकरी चिंतेत
ट्रम्प यांनी त्यांच्या संदेशात असेही नमूद केले की साउथ पार्स गॅस क्षेत्रावर इस्रायलने केलेला हल्ला मध्य पूर्वेतील वाढत्या तणावाच्या पार्श्वभूमीवर झाला. मात्र हिंसा आणि विध्वंसाची ही पातळी वाढल्यास त्याचा इराणच्या भविष्यासाठी दीर्घकालीन परिणाम होऊ शकतो. त्यामुळे परिस्थिती आणखी बिघडू नये, अशी अपेक्षाही डोनाल्ड ट्रम्प यांनी व्यक्त केली.
दरम्यान, इराणने साउथ पार्स गॅस क्षेत्रावर झालेल्या हल्ल्यासाठी अमेरिका आणि इस्रायलला जबाबदार धरले आहे. या घटनेनंतर इराणने कतारमधील गॅस सुविधांवर क्षेपणास्त्र हल्ला केल्याची माहिती समोर आली आहे. या घडामोडींमुळे मध्य पूर्वेतील ऊर्जा सुरक्षा आणि जागतिक ऊर्जा बाजारात मोठी अस्थिरता निर्माण झाली आहे.
तणाव वाढत असताना डोनाल्ड ट्रम्प यांनी दिलेल्या इशाऱ्यामुळे परिस्थिती आणखी गंभीर होण्याची शक्यता व्यक्त केली जात आहे. विशेषतः साउथ पार्स हे जगातील सर्वात मोठ्या गॅस साठ्यांपैकी एक मानले जाते. त्यामुळे या क्षेत्रातील संघर्षाचा परिणाम केवळ मध्य पूर्वेतच नव्हे, तर जागतिक ऊर्जा पुरवठ्यावरही मोठ्या प्रमाणात होऊ शकतो.
