अमेरिकेच्या राष्ट्रीय गुप्तचर संचालक तुलसी गबार्ड यांनी आपल्या पदाचा राजीनामा जाहीर केल्याने अमेरिकन राजकारणात मोठी खळबळ उडाली आहे. गबार्ड यांनी सोशल मीडिया प्लॅटफॉर्म ‘एक्स’वर पोस्ट करत हा निर्णय वैयक्तिक कारणांमुळे घेतल्याचे स्पष्ट केले आहे. मात्र दुसरीकडे आंतरराष्ट्रीय वृत्तसंस्था ‘रॉयटर्स’ने त्यांची हकालपट्टी झाल्याचा दावा केल्याने या प्रकरणाला वेगळे वळण मिळाले आहे.
तुलसी गबार्ड यांनी आपल्या पोस्टमध्ये सांगितले की, त्यांच्या पती अब्राहम यांना हाडांच्या दुर्मिळ कर्करोगाचे निदान झाले आहे. या गंभीर आजारामुळे येत्या काही महिन्यांत त्यांना मोठ्या उपचार प्रक्रियेला सामोरे जावे लागणार आहे. त्यामुळे पतीच्या उपचारादरम्यान त्यांच्यासोबत राहून पूर्ण पाठिंबा देण्यासाठी सार्वजनिक जीवनातून काही काळ दूर जाण्याचा निर्णय घेतल्याचे त्यांनी म्हटले आहे.
“अध्यक्ष डोनाल्ड ट्रम्प यांनी माझ्यावर दाखवलेल्या विश्वासाबद्दल मी मनापासून आभारी आहे. राष्ट्रीय गुप्तचर संस्थेचे नेतृत्व करण्याची संधी मला मिळाली, ही माझ्यासाठी मोठी बाब होती. पण सध्याच्या परिस्थितीत माझ्या कुटुंबाला प्राधान्य देणे आवश्यक आहे,” असे गबार्ड यांनी आपल्या पोस्टमध्ये नमूद केले आहे. ३० जून २०२६ पासून त्यांचा राजीनामा लागू होणार असल्याचेही त्यांनी स्पष्ट केले.
I am deeply grateful for the trust President Trump placed in me and for the opportunity to lead @ODNIgov for the last year and a half. Unfortunately, I must submit my resignation, effective June 30, 2026. My husband, Abraham, has recently been diagnosed with an extremely rare… pic.twitter.com/PS0Dxp5zpd — Tulsi Gabbard ? (@TulsiGabbard) May 22, 2026
दरम्यान, रॉयटर्सच्या वृत्तात वेगळाच दावा करण्यात आला आहे. व्हाईट हाऊसने तुलसी गबार्ड यांच्यावर पद सोडण्यासाठी दबाव टाकल्याचे काही सूत्रांच्या हवाल्याने सांगण्यात आले आहे. त्यामुळे हा केवळ वैयक्तिक कारणांमुळे घेतलेला निर्णय आहे की त्यामागे राजकीय मतभेद आहेत, याबाबत चर्चा रंगली आहे.
तुलसी गबार्ड या अमेरिकन राजकारणातील स्पष्टवक्त्या नेत्या म्हणून ओळखल्या जातात. संरक्षण, परराष्ट्र धोरण आणि राष्ट्रीय सुरक्षेसंदर्भातील मुद्द्यांवर त्यांनी वेळोवेळी ठाम भूमिका घेतली होती. त्यामुळे त्यांच्या अचानक झालेल्या राजीनाम्याने राजकीय वर्तुळात अनेक प्रश्न निर्माण झाले आहेत.
गबार्ड यांच्या निर्णयानंतर सोशल मीडियावरही मोठ्या प्रमाणात प्रतिक्रिया उमटत आहेत. अनेकांनी त्यांच्या पतीच्या प्रकृतीसाठी शुभेच्छा दिल्या असून त्यांच्या निर्णयाला पाठिंबा दर्शवला आहे. तर काहींनी रॉयटर्सच्या वृत्तानंतर या प्रकरणात राजकीय दबावाची शक्यता व्यक्त केली आहे.
आता गबार्ड यांच्या राजीनाम्यानंतर अमेरिकेच्या राष्ट्रीय गुप्तचर विभागाचे पुढील नेतृत्व कोणाकडे जाणार, याकडे सर्वांचे लक्ष लागले आहे. व्हाईट हाऊसकडून यासंदर्भात अधिकृत प्रतिक्रिया येण्याची प्रतीक्षा आहे.
