लुईसविले (अमेरिका): अमेरिकेतील लुईसविले मुहम्मद अली आंतरराष्ट्रीय विमानतळावरून उड्डाण घेतल्यानंतर काही क्षणांतच युनायटेड पार्सल सर्व्हिस कंपनीचे मालवाहू विमान भीषण अपघातग्रस्त झाले. फेडरल एव्हिएशन प्रशासनाच्या माहितीनुसार, एमडी-11 प्रकारचे हे विमान उड्डाण झाल्यानंतर थोड्याच वेळात कोसळले. सध्या या घटनेची चौकशी राष्ट्रीय परिवहन सुरक्षा मंडळाकडून करण्यात येत आहे. अपघातानंतर विमानाला प्रचंड आग लागली आणि काही क्षणांतच परिसर घनदाट धुराने व्यापला. घटनेनंतर हवाई क्षेत्र तत्काळ बंद करण्यात आले आणि आसपासच्या रहिवाशांना सुरक्षित स्थळी हलविण्याचे आदेश देण्यात आले.
युपीएसच्या अधिकृत निवेदनानुसार, या विमानात तीन कर्मचारी होते. अपघाताची माहिती मिळताच लुईसविले महानगर पोलीस, अग्निशमन दल आणि आपत्कालीन पथके तातडीने घटनास्थळी दाखल झाली. केंटकी राज्याचे राज्यपाल अँडी बेशियर यांनी सांगितले की या दुर्घटनेत किमान तीन जणांचा मृत्यू झाला असून अकरा जण जखमी झाले आहेत. त्यांनी म्हटलं, “ही अतिशय दुर्दैवी घटना आहे. आम्ही सर्व केंटकी नागरिकांना या दुर्घटनेतील पीडितांसाठी प्रार्थना करण्याचे आवाहन करतो.” राज्यपालांनी पोलिस आणि अग्निशमन विभागाच्या त्वरित प्रतिसादाचे कौतुक केले, मात्र सांगितले की विमानात असलेल्या ज्वलनशील आणि संभाव्य स्फोटक पदार्थांमुळे परिसर अजूनही धोकादायक आहे.
हेही वाचा: Sunrisers Leeds : हंड्रेड लीगमध्ये मोठा बदल!; नॉर्दर्न सुपरचार्जर्स संघ आता ओळखला जाणार 'या' नावानं
लुईसविले मुहम्मद अली आंतरराष्ट्रीय विमानतळ हे युपीएस वर्ल्डपोर्टचे मुख्य केंद्र आहे, जे जगातील सर्वात मोठ्या पार्सल केंद्रांपैकी एक मानले जाते. हे केंद्र सुमारे 50 लाख चौरस फूटांहून अधिक क्षेत्रफळात पसरलेले असून येथे दररोज 12 हजारांहून अधिक कर्मचारी जवळपास 20 लाख पार्सल्स हाताळतात. त्यामुळे हा अपघात युपीएससाठी मोठा धक्का मानला जात आहे. अपघातग्रस्त विमान एमडी-11 एफ प्रकारचे होते. हे मॉडेल मूळतः मॅकडॉनेल डग्लस कंपनीने विकसित केले असून नंतर बोईंग कंपनीने त्याचे उत्पादन हाती घेतले. हे विमान विशेषतः मालवाहतुकीसाठी वापरले जाते आणि युपीएस, फेडएक्स तसेच लुफ्थांसा कार्गो यांसारख्या मोठ्या कंपन्या हे मॉडेल वापरतात. दुर्घटनाग्रस्त विमान 1991 साली तयार करण्यात आले होते, म्हणजे जवळपास 34 वर्षे जुने होते.
या घटनेनंतर फेडरल एव्हिएशन प्रशासन आणि राष्ट्रीय परिवहन सुरक्षा मंडळ यांच्या संयुक्त टीमकडून तांत्रिक तपासणी सुरू आहे. प्राथमिक अंदाजानुसार, उड्डाणादरम्यान इंजिनमध्ये बिघाड किंवा यांत्रिक अडथळ्यामुळे हा अपघात झाला असावा. स्थानिक नागरिकांना सतर्क राहण्याचे आवाहन प्रशासनाने केले आहे.
हेही वाचा: Drone Bill 2025: "एअरमॉडेलिंगला ड्रोन कायद्यापासून द्यावी सूट " IAMA चा केंद्र सरकारकडे आग्रह