वॉशिंग्टन : अमेरिका-इराण तणावाच्या पार्श्वभूमीवर शांतता चर्चांना गती देण्याचे प्रयत्न सुरू असून, ही प्रक्रिया गुंतागुंतीची आणि वेळखाऊ ठरणार असल्याचे अमेरिकेतील पाकिस्तानचे राजदूत रिजवान सईद शेख यांनी स्पष्ट केले आहे. त्यांनी फॉक्स न्यूजला दिलेल्या मुलाखतीत या चर्चांबाबत महत्त्वाची माहिती दिली.
‘स्पेशल रिपोर्ट’ या कार्यक्रमात बोलताना शेख यांनी सांगितले की, विश्वास निर्माण करण्यासाठी काही प्राथमिक पावले उचलली जात आहेत. जहाजांच्या हालचालींना परवानगी देणे हे त्यातील एक महत्त्वाचे पाऊल असून, सुरुवातीला आठ जहाजांना आणि नंतर आणखी 20 जहाजांना परवानगी देण्यात आली आहे. या निर्णयामुळे चर्चेसाठी आवश्यक असलेले विश्वासाचे वातावरण तयार करण्याचा प्रयत्न होत आहे.
मात्र, इराणमधील सध्याची परिस्थिती या प्रक्रियेस मोठे आव्हान ठरत असल्याचे त्यांनी नमूद केले. सुरू असलेल्या संघर्षामुळे संवाद यंत्रणा मोठ्या प्रमाणात विस्कळीत झाली असून, तेथून वेळेत प्रतिसाद मिळवणे कठीण बनले आहे. त्यामुळे चर्चांसाठी निश्चित केलेल्या मुदती पूर्वीही वाढवण्यात आल्या असून, सध्या ठरवलेल्या कालमर्यादेवर काम सुरू असल्याचे त्यांनी सांगितले.
पाकिस्तान या प्रक्रियेत मध्यस्थाची भूमिका बजावत असला, तरी अंतिम निर्णय आणि चर्चेचे यश हे संघर्षात सहभागी देशांवरच अवलंबून असल्याचे शेख यांनी स्पष्ट केले. संबंधित पक्षांनीच चर्चा यशस्वी करण्यासाठी आवश्यक पावले उचलावी लागतील, असेही त्यांनी अधोरेखित केले.
दरम्यान, अमेरिकेचे राष्ट्राध्यक्ष डोनाल्ड ट्रम्प यांनीही या चर्चांबाबत सकारात्मक संकेत दिले आहेत. पाकिस्तानच्या मध्यस्थीतून अमेरिका आणि इराण यांच्यात अप्रत्यक्ष चर्चा सुरू असून, त्यात सकारात्मक प्रगती होत असल्याचा दावा त्यांनी केला.
तथापि, होर्मुझ सामुद्रधुनी पुन्हा खुली करण्यासाठी लवकरच सहमती होईल का, याबाबत ट्रम्प यांनी कोणतीही ठोस माहिती दिलेली नाही. त्यामुळे या चर्चांचे भवितव्य आणि त्यातून युद्धविरामाचा मार्ग निघणार का, याकडे संपूर्ण जगाचे लक्ष लागले आहे.
