वांद्र्यात खळबळजनक घटना! चार वर्षांच्या चिमुकलीवर अत्याचार; 40 वर्षीय आरोपी अटकेत
मुंबई : वांद्रे पूर्व परिसरात चार वर्षांच्या बालिकेवर लैंगिक अत्याचार झाल्याची धक्कादायक घटना समोर आली आहे. निर्मल नगर पोलीस ठाण्याच्या हद्दीत ही घटना घडली असून, प्रकरणाचे गांभीर्य लक्षात घेऊन पोलिसांनी तातडीने कारवाई करत 40 वर्षीय संशयित आरोपीला अटक केली आहे. पीडित बालिका आणि संशयित आरोपी हे एकाच परिसरात वास्तव्यास असल्याची माहिती आहे.
मिळालेल्या माहितीनुसार, बालिका परिसरात एकटी असल्याचे पाहून संशयित आरोपीने तिच्यावर अत्याचार केल्याचा आरोप आहे. घटनेची माहिती मिळताच निर्मल नगर पोलिसांनी तातडीने तपास सुरू केला. पोलिसांनी परिसरातील माहितीच्या आधारे शोधमोहीम राबवत संशयिताचा शोध घेतला आणि त्याला ताब्यात घेतले.
या प्रकरणी पोलिसांनी बालकांचे लैंगिक अपराधांपासून संरक्षण करणाऱ्या पोक्सो कायद्यांतर्गत गुन्हा दाखल केला आहे. घटनेचे गांभीर्य लक्षात घेऊन पोलिसांनी तपासासाठी विशेष पथक तयार केले होते. या पथकाने संशयित आरोपीचा शोध घेत त्याला अटक केली.
दरम्यान, पीडित बालिकेला वैद्यकीय तपासणी आणि आवश्यक उपचारांसाठी पालिकेच्या रुग्णालयात दाखल करण्यात आले आहे. बालिकेच्या सुरक्षिततेसह तिच्या मानसिक आणि शारीरिक स्थितीची काळजी घेण्यासाठी संबंधित यंत्रणांकडून आवश्यक प्रक्रिया केली जात आहे.
या घटनेची माहिती परिसरात पसरल्यानंतर नागरिकांमध्ये संतापाचे वातावरण निर्माण झाले आहे. बालिकेवरील अत्याचाराच्या घटनेचा निषेध करत स्थानिक नागरिकांनी आरोपीवर कठोर कायदेशीर कारवाई करण्याची मागणी केली आहे.
पोलिसांकडून बाल कल्याण समितीच्या मार्गदर्शक तत्त्वांनुसार पुढील तपास केला जात आहे. घटनेशी संबंधित पुरावे, परिस्थिती आणि इतर बाबींची चौकशी करण्यात येत असून, आरोपीला न्यायालयात हजर केले जाणार आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.