ठाणे जिल्ह्यातील कल्याण शहरातून एक धक्कादायक गुन्ह्याची घटना समोर आली आहे. मलंग रोड परिसरातील नीलकंठ सोसायटीतील एका फ्लॅटमध्ये तरुणाचा कुजलेल्या अवस्थेतील मृतदेह आढळून आल्याने परिसरात मोठी खळबळ उडाली आहे. प्राथमिक तपासात हा मृत्यू नैसर्गिक नसून धारदार शस्त्राने हल्ला करून तरुणाचा जीव घेतल्याचा संशय पोलिसांनी व्यक्त केला आहे.
मिळालेल्या माहितीनुसार, मृतदेह गोणीत भरून फ्लॅटच्या बाथरूममध्ये लपवण्यात आला होता. काही दिवसांपासून फ्लॅटमधून तीव्र दुर्गंधी येत असल्याने स्थानिकांमध्ये संशय निर्माण झाला. याचदरम्यान संबंधित फ्लॅटच्या मालकाला एका महिलेचा व्हॉईस मेसेज प्राप्त झाला. त्या संदेशात बाथरूममध्ये मृतदेह असल्याची माहिती दिल्याचे समोर आले. त्यानंतर तातडीने पोलिसांना कळविण्यात आले.
घटनेची माहिती मिळताच मानपाडा पोलीस, फॉरेन्सिक तज्ज्ञ आणि गुन्हे अन्वेषण पथक घटनास्थळी दाखल झाले. पंचनामा करून मृतदेह ताब्यात घेण्यात आला आणि शवविच्छेदनासाठी पाठवण्यात आला. शवविच्छेदन अहवालानंतर मृत्यूचे नेमके कारण स्पष्ट होणार आहे.
प्राथमिक तपासात पुरावे नष्ट करण्यासाठी आरोपी महिलेने बाथरूममधील नळ तब्बल २४ तास सुरू ठेवला असावा, असा संशय व्यक्त केला जात आहे. त्यामुळे मृतदेह लवकर कुजावा आणि तपासात अडथळे निर्माण व्हावेत, असा उद्देश असावा, अशी शक्यता तपास यंत्रणा पडताळून पाहत आहे.
घटनेनंतर संबंधित महिला कोलकात्याकडे फरार झाल्याची माहिती समोर आली आहे. तिच्या अटकेसाठी मानपाडा पोलिसांनी विशेष पथक तयार केले असून ते कोलकात्याकडे रवाना झाले आहे. आरोपीचा शोध सुरू असून विविध ठिकाणचे सीसीटीव्ही फुटेज, मोबाईल लोकेशन आणि इतर तांत्रिक पुराव्यांची तपासणी केली जात आहे.
या प्रकरणी मानपाडा पोलीस ठाण्यात गुन्हा दाखल करण्यात आला असून हत्या नेमकी कोणत्या कारणातून झाली, याचा तपास सुरू आहे. प्रेमसंबंधातून हा प्रकार घडला का, की यामागे अन्य काही कारण आहे, याचाही शोध पोलीस घेत आहेत. या घटनेमुळे कल्याण परिसरात भीतीचे वातावरण निर्माण झाले असून नागरिकांनी आरोपीला लवकर अटक करण्याची मागणी केली आहे.
