राजस्थान : राजस्थानमधील बाडमेर शहरात रविवारी संध्याकाळी एका 7 वर्षांच्या मुलीवर तिच्याच शेजाऱ्याने बलात्कार केल्याची घटना घडली. आरोपीने घर दाखवण्याचे आमिष दाखवून तिला सोबत नेले होते. पोलिसांनी दिलेल्या माहितीनुसार, बाडमेर शहरातील एका भागात ही घटना घडली. पोलिसांनी तत्परतेने कारवाई करत घटनास्थळाची पाहणी केली. तसेच आरोपीला ताब्यात घेतले. ती अल्पवयीन मुलगी घरासमोर खेळत असताना आरोपी तरुणाने एका अनोळखी व्यक्तीचे नाव घेऊन तिला त्याचे घर दाखवण्यास सांगितले. तो तिला सोबत घेऊन गेला आणि एका निर्जन ठिकाणी नेऊन झुडपांमध्ये तिच्यावर बलात्कार केला.
वेदनांनी रडत-रडत ती मुलगी घरी पोहोचली. तिने आपल्या कुटुंबीयांना घडलेला सर्व प्रकार सांगितला. कुटुंबीयांनी तिला तातडीने रुग्णालयात नेले. माहिती मिळताच पोलिसांनी घटनास्थळी धाव घेत कुटुंबीयांचे जबाब नोंदवून घेतले. पोलिसांच्या एका पथकाने घटनास्थळाची पाहणी केली. तसेच मुलीच्या घरीही भेट दिली. पोलिसांनी तेज सिंग यांचा मुलगा माघ सिंग या संशयिताला ताब्यात घेतले आहे. या घटनेनंतर कुटुंबीय आणि स्थानिकांमध्ये संतापाची लाट उसळली असून, त्यांनी आरोपीविरुद्ध तीव्र रोष व्यक्त करण्यात आला आहे. पोलिसांनी मुलीची वैद्यकीय तपासणी केली आहे. तर आरोपी सध्या पोलीस कोठडीत असून अधिक तपास सुरू आहे.
