नांदेड : नांदेड शहरातील भाग्यनगर परिसरात एका अल्पवयीन मुलीवर तरुणाने चाकूने हल्ला केल्याची घटना समोर आली आहे. मुलगी शिकवणीसाठी जात असताना आरोपीने तिला रस्त्यात अडवून तिच्यावर हल्ला केल्याची प्राथमिक माहिती आहे. या घटनेनंतर परिसरात एकच खळबळ उडाली. हल्ल्यानंतर संतप्त झालेल्या नागरिकांनी आरोपीला पकडून त्याला चोप दिला आणि त्यानंतर पोलिसांच्या स्वाधीन केले.
शिकवणीला जात असताना मुलीला अडवले
मिळालेल्या माहितीनुसार, भाग्यनगर परिसरातील एका खासगी कोचिंग क्लासला अल्पवयीन मुलगी शिकवणीसाठी जात होती. याचदरम्यान आरोपी रोहित पोहरे याने तिला रस्त्यात गाठले. त्यानंतर तिच्यावर चाकूने हल्ला केल्याचे सांगितले जात आहे.
हल्ल्यात मुलगी जखमी झाली असून, तिला उपचारासाठी खासगी रुग्णालयात दाखल करण्यात आले आहे. तिच्यावर सध्या उपचार सुरू असून, तिच्या प्रकृतीबाबत अधिकृत माहिती समोर आलेली नाही.
लग्नाच्या मागणीला नकार दिल्याचा संशय
पोलिस सूत्रांनी दिलेल्या प्राथमिक माहितीनुसार, आरोपी रोहित पोहरे याने संबंधित अल्पवयीन मुलीकडे लग्नाची मागणी केली होती. मात्र, मुलीने या मागणीला नकार दिल्यानंतर त्याने तिच्यावर हल्ला केल्याची शक्यता व्यक्त केली जात आहे.
मात्र, हल्ल्यामागील नेमके कारण आणि घटनेचा संपूर्ण तपशील पोलीस तपासानंतरच स्पष्ट होणार आहे. अल्पवयीन मुलगी असल्याने या प्रकरणाकडे पोलिसांकडून गांभीर्याने पाहिले जात आहे.
नागरिकांनी आरोपीला पकडले
घटना घडल्यानंतर परिसरातील नागरिकांनी धाव घेत आरोपीला पकडले. संतप्त जमावाने आरोपीला मारहाण केल्याची माहिती आहे. त्यानंतर त्याला भाग्यनगर पोलिसांच्या ताब्यात देण्यात आले.
दरम्यान, भाग्यनगर पोलिसांनी रोहित पोहरे याला ताब्यात घेतले असून, या प्रकरणाचा पुढील तपास सुरू आहे. हल्ल्यासाठी वापरलेले शस्त्र, आरोपी आणि पीडित मुलीतील पूर्वीचे संबंध तसेच हल्ल्याचे नेमके कारण याबाबत पोलीस अधिक तपास करत आहेत. तपासातून या घटनेमागील संपूर्ण सत्य समोर येणार आहे.
