प्रदीप पूर्णेकर हत्या प्रकरणात SIT ला मोठं यश! कर्नाळा जंगलातून हत्येसाठी वापरलेलं पिस्तूल आणि मोबाईल जप्त

रायगड : प्रदीप पूर्णेकर हत्या प्रकरणाच्या तपासात विशेष तपास पथकाला (SIT) मोठे यश मिळाले आहे. या हत्येसाठी वापरण्यात आल्याचा संशय असलेली शस्त्रे पोलिसांनी रायगड जिल्ह्यातील कर्नाळा जंगलातून जप्त केली आहेत. या कारवाईमुळे हत्या प्रकरणाच्या तपासाला महत्त्वाची दिशा मिळण्याची शक्यता आहे.

मिळालेल्या माहितीनुसार, प्रदीप पूर्णेकर यांच्या हत्येनंतर आरोपींनी गुन्ह्यात वापरलेली हत्यारे कर्नाळा जंगल परिसरात टाकून दिली होती. पोलिसांनी तपासादरम्यान मिळालेल्या माहितीच्या आधारे जंगल परिसरात शोधमोहीम राबवली. यावेळी पोलिसांच्या हाती एक देशी पिस्तूल आणि आरोपीचा मोबाईल लागला.

ही कारवाई ठाणे क्राईम ब्रांचच्या खंडणी विरोधी पथकाकडून करण्यात आली. SIT प्रमुख अमरसिंह जाधव आणि विशेष तपास अधिकारी शैलेश साळवी यांच्या मार्गदर्शनाखाली पथकाने कर्नाळा जंगलात शोध घेतला. या शोधमोहीमेदरम्यान हत्येत वापरण्यात आल्याचे सांगितले जाणारे देशी पिस्तूल पोलिसांनी जप्त केले.

हत्येनंतर आरोपींनी पुरावे नष्ट करण्याच्या उद्देशाने शस्त्र कर्नाळा जंगलात लपवून ठेवल्याचा संशय आहे. पोलिसांनी आता जप्त केलेल्या पिस्तुलाची आणि मोबाईलची तपासणी सुरू केली आहे. या दोन्ही वस्तू तपासात महत्त्वाचे पुरावे ठरू शकतात.

विशेष तपास पथकाकडून या प्रकरणातील आरोपींची भूमिका, हत्येमागील कारण आणि गुन्ह्याची संपूर्ण पार्श्वभूमी तपासली जात आहे. जप्त करण्यात आलेल्या देशी पिस्तुलाचा हत्येशी नेमका संबंध आहे का, यासाठी त्याची फॉरेन्सिक तपासणी केली जाण्याची शक्यता आहे. तसेच जप्त मोबाईलमधूनही पोलिसांना महत्त्वाची माहिती मिळण्याची शक्यता आहे.

दरम्यान, प्रदीप पूर्णेकर हत्या प्रकरणात कर्नाळा जंगलातून हत्यारे जप्त झाल्याने SIT च्या तपासाला मोठी मदत मिळाली आहे. या कारवाईनंतर पुढील तपासाला वेग आला असून, हत्येच्या कटामागील इतर बाबी आणि संबंधित व्यक्तींची भूमिका तपासण्याचे काम पोलिसांकडून सुरू आहे.